Almatyda jol polıtsııasy qyzmetkerine shabýyl jasaǵan tórt adam qamaýǵa alyndy
ALMATY. 24 qazan. QazAqparat /Názıra Eleýhan/ - Oqıǵa ótken juma kúni keshki saǵat jetiler shamasynda oryn alǵan.
Jol polıtsııasynyń ekıpajy Medeý aýdanyndaǵy Núsipbekov kóshesinde birneshe jol erejesin buzǵan «Mersedes Bents» markaly avtokóligin toqtatqan. Rólde otyrǵan 27 jastaǵy er adam birden dóreki minez kórsete bastaǵan.
«Keıin belgili bolǵandaı, onyń júrgizý kýáligi bolmaǵan. Ekinshiden, kólik óziniki emes, ári senim qaǵazy jáne kóliktiń tirkelý qujattary da bolmaǵan. Kólik júrgizýshisi qarsy jol betine shyǵyp, úlken jol erejesin buzýshylyq jasady. Tórt márte jol erejesin buzǵandyǵy úshin polıtsııa qyzmetkerleri ákimshilik hattama jasaımyz degende, K. esimdi álgi azamat ınspektorlarǵa qarsylyq bildirip, balaǵattap, polıtsııa qyzmetkerlerine qol jumsaǵan. Oǵan kólikte otyrǵan úsh dosy kelip qosylyp, tártip saqshysyn tunshyqtyryp, urǵan, ofıtserlerdiń pogonyn julyp tastaǵan. Olardyń arasyndaǵy bireýi polıtsııa avtokóliginiń dońǵalaǵyn tesip tastaǵan. Jolda ótip bara jatqan júrgizýshiler bizdiń ınspektorlarǵa kómek kórsetýiniń arqasynda buzaqylar ustalyp, qazir qamaýda otyr»,-dedi Almaty qalasynyń ІІD jol polıtsııasy basqarmasynyń bastyǵy, polıtsııa polkovnıgi Arman Sarbasov.
Onyń aıtýynsha, ustalǵandardyń biri- 27 jasta, al qalǵan ekeýi 23 jastaǵy jigitter. «Barlyǵy Almaty oblysynyń turǵyndary. Tekserý barysynda olardyń esh jerde jumys istemeıtindigi anyqtaldy. Qazir olarǵa bılik ókilderine qatysty zorlyq kórsetkendigi úshin qylmystyq is qozǵaldy. Tórteýi de zań aldynda jaýap beretin bolady»,-dedi polkovnık A.Sarbasov.
