Almatyda jol polıtsııasy evakýatordyń kómegimen kólik urlaýshylarǵa qarsy sharalar qoldanýda
ALMATY. Sáýirdiń 7-ci. QazAqparat /Erlik Erjanuly/ - Almatyda jyl basynan beri evakýatordyń, portal men manıpýlıatordyń kómegimen bógde adamnyń kóligin urlaýdyń eki oqıǵasy tirkeldi.
Jol polıtsııasy aldaǵy ýaqytta mundaı jaǵdaılardyń qaıtalanbaýy úshin arnaıy is-sharalardy júzege asyrýda, dep habarlaıdy QazAqparat qalalyq ishki departamentiniń baspasóz qyzmetine silteme jasap.
Polıtseılerdiń aıtýynsha, kólik urlyǵyna qatysty qylmystardy tergeý sharalary kezinde evakýatorshy-mamandar ózderiniń oǵan qalaı qatysty bop qalǵandaryn ańǵarmaı qalǵan. Sol sebepti olar jeńil avtomashınalardy tasymaldaýmen aınalysatyn jeke tulǵalar men memlekettik kásiporyndardyń basshylarymen arnaıy kezdesýler ótkizgen.
«Almatyda kólik quraldaryn evakýatsııalaýmen 100 shaqty jeke tulǵa aınalysady. Biz olarǵa joǵaryda oryn alǵan qylmystyq jáıttarmen tanystyryp, olardyń jaýapkershiligin túsindirdik. Sondaı-aq tapsyrys berýshiden kólik qujattaryn talap etýi kerektigin jáne kólikterdi tasymaldaýdyń esebin júrgizip otyrýǵa mindettedik», deıdi qalalyq ishik ister departamentiniń Jol polıtsııasy basqarmasynyń bastyǵy Arman Sarbasov. Onyń sózine qaraǵanda, bul kezdesýler kezinde polıtsııa men kásiporyn jetekshileri yntymaqtastyq týraly kelisimderge qol qoıǵan. Onda taraptardyń óz kúshin barynsha azamattardyń qaýipsizdigi men olardyń múlikterin saqtaýǵa baǵyttaýy atap kórsetilgen. Kezdesý kezinde olar sonymen qatar, kólikter quraldaryn evakýatsııalaýmen aınalysatyn kásiporyndardyń qatysýymen oryn alǵan urlyqqa qatysty jáıtterdi eskertý máselelerin de jan-jaqty talqylady.
