Almatyda jol qozǵalysy erejesin óreskel buzǵan avtobýs júrgizýshisi ákimshilik jaýapqa tartyldy
ALMATY. QazAqparat - Almatyda jol qozǵalysy erejesin óreskel túrde buzǵan avtobýs júrgizýshisi ákimshilik jaýapqa tartyldy. Bul týraly búgin Almaty qalalyq ІІD baspasóz qyzmetinen habarlady.
Almaty polıtsııasy qoǵamdyq kólik júrgizýshisiniń birden eki quqyqbuzýshylyq áreketke jol bergendigin anyqtady. Birinshi - qarsy jolaqqa shyǵyp ketken, ekinshi - baǵdarshamnyń qyzyl shamy jansa da jol qıylysynan ótken.
«Bul oqıǵa 31 mamyr kúni Almaty qalasynyń Bostandyq aýdanynda oryn aldy. Avtobýs júrgizýshisi Gagarın kóshesimen soltústik baǵytta kele jatyp, qarsy jolaqqa shyǵyp ketip, Tımırıazev kóshesiniń aldynda baǵdarshamnyń qyzyl shamynyń janǵanyna qaramastan, jol qıylysynan ótip, sol jaqqa burylyp ketken. Bul quqyqbuzýshylyq áreket beınelengen beınetaspa sol kúni-aq áleýmettik jelilerde paıda boldy. Bizdiń tarapymyzdan, tıisti ákimshilik yqpal etý sharasy qoldanyldy.
Sonymen, 1980 jyly týǵan, Ý. esimdi azamatqa qatysty ınspektorlar QR Ákimshilik quqyq buzýshylyq kodeksiniń 596-babynyń 3-shi tarmaǵy men 599-babynyń 1-shi tarmaǵy negizinde eki hattama toltyrdy. Іstiń materıaldary endi sotqa jiberiledi. Jalpy, eki bapqa sáıkes, bul quqyq buzýshylyq áreketter úshin bir jylǵa deıin kólik basqarý quqyǵynan aıyrý, sondaı-aq, 10 aılyq eseptik kórsetkish kóleminde aıyppul salý kózdelgen», - dedi Almaty qalalyq ІІD Jergilikti polıtsııa qyzmetiniń Jol-patrýldik polıtsııa Polkiniń komandıri, polıtsııa maıory Murat Baıǵazınov.
