Almatyda «Jol qozǵalys qaýipsizdigi aptalyǵy» bastaldy
ALMATY. Tamyzdyń 18-i. QazAqparat /Názıra Eleýhan/- Almatyda «Jol qozǵalys qaýipsizdigi aptalyǵy» bastaldy, dep habarlaıdy QazAqparat.
Bul operatsııa qala joldarynda qoǵamdyq jáne jol qozǵalysy qaýipsizdigin qamtamasyz etý men jol qozǵalysy erejesin óreskel buzýshylardy anyqtaýǵa baǵyttalǵan.
"Aǵymdaǵy jyly sońǵy 7 aıdyń qorytyndysy boıynsha qalada jol-kólik oqıǵalary men avarııalyq jaǵdaı sanynyń edáýir azaıǵandyǵy baıqalady. Jyl basynan osy ýaqytqa deıin 1 226 jol-kólik oqıǵasy tirkeldi, bul kórsetkish 2009 jylǵa qaraǵanda -1.0 paıyzǵa tómen (1239). Ár túrli dene jaraqatyn alǵandardyń sany bıyl -2 paıyzǵa tómendep otyr. 2009 jyly 1 355 bolsa, bıyl 1 333 adam jaraqat aldy", dedi Almaty qalasynyń ІІD-niń jol polıtsııa Basqarmasynyń bastyǵy, polıtsııa polkovnıgi Arman Sarbasov. Onyń aıtýynsha arnaıy qabyldanǵan sharalardyń arqasynda qala joldaryndaǵy jol-kólik jaǵdaılary turaqtanǵan.
Ol sonymen qatar, jańa oqý jyly aldynda "Nazar aýdaryńyzdar, balalar!" atty aldyn-alý sharasyna daıyndyqtar júrgizilip jatqandyǵyn habarlady. "Bul shara tamyz aıynyń 31-nen qyrkúıek aıynyń 9-na deıin ótedi. Shara barysynda ár mekteptiń janynan (181 mektepke) jol polıtsııa qyzmetkeri bekitiletin bolady. Olar balalar qaýipsizdigin qamtamasyz etý maqsatynda oqýshylarmen jol júrý erejesin saqtaý boıynsha aldyn-alý jumystaryn júrgizedi", dedi Arman Sarbasov.
Anyqtama úshin: Jyl basynan beri balalardyń qatysýymen 165 jol-kólik oqıǵasy tirkelgen. Bıyl onyń sany 2009 jylǵa qaraǵanda 2 paıyzǵa tómendegen. 2009 jyly 174 bala ár túrli jaraqat alsa, bıyl 168 bala dene jaraqatyn alǵan. Bul kórsetkish 2009 jylǵa qaraǵanda -3 paıyzǵa tómen.
