Almatyda jol-kólik apatynan 1 adam qaza taýyp, 5 adam jaraqat aldy
ALMATY. QazAqparat - Almatyda jol-kólik apatynan 1 adam qaza taýyp, 5 adam jaraqat aldy. Qazir osy oqıǵaǵa baılanysty sotqa deıingi tergeý amaldary bastaldy.
Bul týraly búgin Almaty qalalyq ІІD baspasóz qyzmetinen habarlady.
«Búgin tańǵy saǵat 05:20-da Abaı dańǵyly men Tilendıev kóshesiniń qıylysynda Daewoo Nexia jáne Toyota Ipsum jeńil avtokólikteri soqtyǵysty. 1986 jyly týǵan Ý. esimdi júrgizýshi Daewoo Nexia avtokóligimen Tilendıev kóshesi boıymen soltústik baǵytta, al Toyota Ipsum avtokóligin basqarǵan júrgizýshi Abaı dańǵyly boıymen batys baǵytta kele jatqan. Jol-kólik apaty saldarynan barlyǵy 6 adam zardap shekti», - dedi S. Ázirbek.
Sonymen qatar ol Toyota Ipsum avtokóligindegi 1990 jyly týǵan jolaýshy qyzdyń alǵan jaraqattan oqıǵa ornynda kóz jumǵandyǵyn jáne jaraqat alǵan taǵy bir 1988 jyly týǵan boıjetkenniń ortalyq qalalyq klınıkalyq aýrýhanaǵa jetkizilgendigin aıtty.
Ár túrli jaraqat alǵan taǵy úsh er azamat ortalyq qalalyq klınıkalyq aýrýhanaǵa jetkizildi. Basqa da zardap shekkender aýrýhanaǵa jatýdan bas tartty.
«Osy oqıǵa boıynsha Tergeý basqarmasy QR Qylmystyq Kodeksiniń 345-shi babynyń 3-shi tarmaǵy (Kisi ólimi) boıynsha sotqa deıingi tergeý amaldaryn bastady. Birqatar sot-medıtsınalyq jáne avtotehnıkalyq saraptama júrgiziletin bolady. Sonyń nátıjesinde júrgizýshilerdiń qaısysynyń jol erejesin buzyp, apattyń oryn alýyna sebepker bolǵandyǵy anyqtalady», - dedi S. Ázirbek.
