Almatyda jol erejesin buzǵan moped júrgizýshiler ákimshilik jaýapqa tartylady
ALMATY. QazAqparat – Almatyda moped júrgizýshiler jol erejesin jıi buzady. Bul týraly Almaty qalalyq polıtsııa departamentiniń jergilikti polıtsııa qyzmeti basqarmasynyń bastyǵy Erjan Uzabaev aıtty, dep habarlaıdy QazAqparat tilshisi.
Spıkerdiń aıtýynsha, qaladaǵy moped júrgizýshiler úshin jol erejesi, durys oılaý men ózin-ózi saqtaý ınstınkti joq sekildi.
«Olar avtokólikterdiń arasynda oılanbastan túrli manevrlar jasaıdy, apattyq jaǵdaılar týǵyzady, baǵdarshamnyń qyzyl túsine ótip ketedi, joldyń qarama-qarsy betine shyǵyp ketedi, jaıaý júrginshiler jolymen de júre beredi. Bir sózben aıtqanda, ártúrli jerde aıaqasty paıda bolyp, dál solaı joǵalyp ketedi. Aldyn alý sharalary keńinen júrgizilse de, moped júrgizýshiler tarapynan jol erejesin buzý oqıǵalary azaımaı tur. Sebebi, olardyń kópshiligi jazasyz qalamyz dep oılaıdy. Biraq, bul jalǵan senim. Quqyqbuzýshylyq anyqtalǵan jaǵdaıda, polıtsııa shara qoldanatyn bolady. Júrgizýshini ákimshilik jaýapqa tarta otyryp, kólik quralyn aıyppul turaǵyna qoıady», – dedi Erjan Uzabaev.
Ol sondaı-aq moped júrgizýshilerdi jeke qaýipsizdigi úshin túngi ýaqytta júrgen kezde kıimderine nemese kólik quraldaryna shaǵylystyratyn elementterdiń bolýy qajet ekenin atap ótti.
Eske salaıyq, Almatyda jyl basynan beri moped mingenderge qatysty 199 jol apaty bolyp, saldarynan 198 adam zardap shegip, bir adam qaza tapty. Ótken jyly 778 jol apaty bolyp, 836 adam zardap shegip, 7 adam qaıtys bolǵan.
