Almatyda jol aıryǵy qurylysyna baılanysty 117 otbasyna ótemaqy beriledi
ALMATY. QazAqparat – Almatydaǵy úlken jol aıryǵynyń qurylysy bıyl bastalady. Bul týraly Jetisý aýdanynyń ákimi Maqsat Qıqymov baspasóz máslıhaty barysynda málim etti, dep habarlaıdy QazAqparat tilshisi.
«Seıfýllın -Jansúgirov kósheleriniń qıylysyndaǵy jol aıryǵynyń qurylysy bıyl bastalady. Uzaq ýaqyt boıy súriletin turǵyn úıde turatyn 117 otbasyna beriletin ótemaqy máselesi sheshimin tappaı keldi. Ótken jyldyń tamyzynda buzylýǵa jatatyn ýchaskelerdiń ıeleri Almaty qalasynyń ákimi Baqytjan Saǵyntaevpen kezdesý kezinde kómek surap, ótinish bildirgen edi. Qala ákimi 29 qazanda Memleket basshysy Qasym-Jomart Toqaevtyń qatysýymen ótken keńeste jol aıryqtaryn salý úshin alynatyn ýchaskelerge ótemaqy tóleý máselesin kótergen bolatyn. Sóıtip qarjy máselesi sheshildi»,– deıdi Maqsat Qıqymov.
Maqsat Qıqymovtyń aıtýynsha, ótken jyldyń qazan aıynda respýblıkalyq bıýdjet qaıta naqtylanyp, ótemaqy tóleýge qarjy bólindi.
«Jalpy 117 otbasyna ótemaqy tólendi»,- deıdi spıker.
