Almatyda jol apatynan jedel járdem dárigeri men júrgizýshisi jaraqat aldy
ALMATY. QazAqparat - Almatyda jol apatynan jedel járdem dárigeri men júrgizýshisi jaraqat aldy, dep habarlaıdy QazAqparat tilshisi.
Qalalyq poltsııa departamentiniń habarlaýynsha, jol apaty Naýryzbaı aýdanyndaǵy Qalqaman shaǵyn aýdanynda 26 naýryz kúni túngi 23:0-de bolǵan.
20 jastaǵy Mercedes júrgizýshi Baızaq batyr kóshesimen kele jatyp, basty jolǵa shyǵyp ketken.
Sol sátte basty jolda kele jatqan jedel járdem kóligimen soqtyǵysqan.
«Bul is Naýryzbaı aýdandyq polıtsııa basqarmasynyń tergeýine alyndy. Qazir qajetti saraptamalar taǵaıyndaldy. Sonyń nátıjesinde protsessýaldy sheshim qabyldanatyn bolady», - dedi qalalyq Polıtsııa departamentiniń resmı ókili Saltanat Ázirbek.
Soqqydan 47 jastaǵy jedel járdem júrgizýshisi men 24 jastaǵy feldsher jaraqat aldy.
«26 naýryzda túngi 23:42-de jol apatynan zardap shekken eki adam aýrýhanaǵa jetkizildi. 24 jastaǵy jedel járdem feldsheri jabyq mı jaraqatymen tústi. Oǵan mıy shaıqalǵan, sol jaq qoly, oń jaq tabany, bel omyrtqasy jumsaq tinderi jaraqat alǵan degen dıagnoz qoıyldy. Qazir naýqastyń jaǵdaıy ortasha. 47 jastaǵy júrgizýshi keýde qýysynyń jaraqatymen travmatologııa bólimine jatqyzyldy», - dedi qalalyq Qoǵamdyq densaýlyq basqarmasynan.
