Almatyda jol apatynan sábıimen birge áıel zardap shekti
ALMATY. QazAqparat - Almatyda kólik aǵyny joǵary kóshelerdiń birinde jol apaty bolyp, saldarynan kishkentaı balasy bar áıel zardap shekti, dep habarlaıdy QazAqparat tilshisi.
Jol-kólik oqıǵasy Raıymbek dańǵyly boıynda, «Maksıma» saýda ortalyǵyna jetpeı oryn aldy.
Oqıǵaǵa kýá bolǵandardyń aıtýynsha, Toyota kóligi avtobýs jolaǵy boıynsha Raıymbek dańǵylymen kele jatqan. Dál sol baǵytta oń jaq shetki qatarda Volkswagen Golf markaly mashına júrip kele jatty. Bir mezette nemis kóliginiń júrgizýshisi ońǵa qaraı burylmaq bolyp, avtomashınalar soqtyǵysyp qalǵan.
Volkswagen Golf-te bolǵan jolaýshy áıel 1,5 jastaǵy balasymen birge zardap shekti. Oqıǵa ornyna jedel járdem brıgadasy jetip, olardy qalalyq aýrýhanalardyń birine alyp ketti.
Jol apaty ornynda polıtsııa qyzmetkerleri jumys isteýde.
