Almatyda jol apatynan bolatyn ólim-jitim azaıyp keledi - polıtsııa
ALMATY. QazAqparat - Almaty Polıtsııa departamenti qaladaǵy jol apattaryna turaqty túrde taldaý júrgizip, jol-kólik oqıǵalarynyń sebepterin anyqtaýmen aınalysady, dep habarlaıdy QazAqparat tilshisi.
«Bıyl segiz aıda qalada adamdar jaraqat alǵan jol-kólik oqıǵalarynyń sany 40,1%-ǵa azaıdy. Qaıtys bolǵandar sany - 42,3%-ǵa, jaraqat alǵandar sany 41,6% azaıdy. Jol apatynan 56 adam: 21 júrgizýshi, onyń ishinde 2 moped, 3 mototsıkl, bir kvadrotsıkl júrgizýshisi, 9 jolaýshy, 25 jaıaý júrginshi, bir velosıpedshi qaıtys bolǵan. Jol-kólik oqıǵalarynyń negizgi sebebi manevr jasaý erejelerin buzý bolyp otyr. Osy sebeppen 649 jaǵdaı tirkelgen», – dedi Almaty qalalyq Polıtsııa departamenti ákimshilik polıtsııa basqarmasynyń bastyǵy Jandos Muratálıev.
Spıkerdiń aıtýynsha, adam qaǵýmen baılanysty jol-kólik oqıǵalary jyl basynan 767 ret bolǵan. Onyń ishinde júrgizýshiniń kinásinen – 631, jaıaý júrginshiniń kinásinen 8 oqıǵa bolǵan.
Jol-kólik oqıǵalarynyń kópshiligi kúndizgi ýaqytta, saǵat 06: 00-den 22: 00-ge deıin bolǵan.
Taldaýǵa sáıkes kóbinese juma kúnderi (291 jol-kólik oqıǵasy) bolǵan jol apatynan 7 adam qaza tapqan.
