Almatyda jol apatynan bir adam qaza taýyp, bes bala zardap shekti
ALMATY. QazAqparat - Almatyda iri jol-kólik apatynan bir adam qaza taýyp, bes bala zardap shekti, dep habarlaıdy «QazAqparat» HAA tilshisi.
Jol apaty Alǵabas shaǵyn aýdanynda boldy. Saldarynan bir adam qaza taýyp, bes bala zardap shekti. Qoǵamdyq densaýlyq saqtaý basqarmasynyń málimetinshe, zardap shekken balalar «Balalar shuǵyl medıtsınalyq járdem ortalyǵyna» jetkizildi. Balalardyń eń úlkeni 12 jasta, qalǵandary 8 jáne 9-da. Eń kishisi jaqynda ǵana 4 jasqa tolǵan.
«Bárinen 8 jastaǵy bala qatty zardap shekken. Oǵan «bassúıek-mı jaraqaty, mıdyń zaqymdanýy, bet terisiniń jyrtylǵan jarasy» dıagnozdary qoıyldy. Qazir jaǵdaıy aýyr. Degenmen, ómirine tóngen qaýip joq. Qalǵan balalar jeńil jaraqattar alǵan. Olar ambýlatorlyq em alý úshin úılerine jiberildi», - dep habarlady vedomstvodan.
36 jastaǵy kólik júrgizýshisi jedel járdem jetkenshe kóz jumdy. Qalǵan eki eresek jolaýshy túrli deńgeıdegi jeńil jaraqattar alǵan.
Almaty Polıtsııa departamentiniń resmı ókili Saltanat Ázirbektiń aqparatyna sáıkes, Tergeý basqarmasy QR Qylmystyq kodeksiniń 345-babynyń 3-bóligi boıynsha aldyn ala tergeý amaldaryn bastady. Oqıǵa boıynsha tıisti saraptamalar taǵaıyndaldy.
Avtory Gúlzát Sahova.
