Almatyda jol apatynan aman qalǵan aktrısa áli jansaqtaý bóliminde jatyr
ALMATY. QazAqparat - Almatyda bolǵan jantúrshigerlik jol apatynan aman qalǵan aktrısa Aızada Satybaldıevanyń jaǵdaıy áli de aýyr. Bul týraly QazAqparat tilshisine qalalyq Densaýlyq saqtaý basqarmasynyń baspasóz qyzmetinen habarlandy.
«Aızada Satybaldıevanyń jaǵdaıyn dárigerler turaqty biraq aýyr dep baǵalap otyr. Ol Almaty qalalyq jedel shuǵyl kómek kórsetý aýrýhanasynyń jansaqtaý bóliminde jatyr. Ázirge dárigerler qandaı da bir boljam aıtýǵa áli erte dep otyr», - dedi baspasóz qyzmetiniń ókilderi.
Aıta ketý kerek, jol apaty 29-jeltoqsanda boldy.
Seıfýllın men Abaı kósheleriniń qıylysynda Mitsubishi Galant pen «Mercedes Benz G-55» kólikteri soqtyǵysqan.
Jol apatynan Mitsubishi Galant kóliginde bolǵan úsh adam, belgili aktrısa Sholpan Elgezek pen onyń qurbysy jáne Mitsubishi Galant júrgizýshisi kóz jumdy.
Al, kólikte bolǵan aktrısa, M.Áýezov atyndaǵy qazaq memlekettik akademııalyq drama teatrynyń telejúrgizýshi Aızada Satybaldıeva alty qabyrǵasy synyp asa aýyr halde Almaty qalalyq shuǵyl kómek kórsetý aýrýhanasynyń jansaqtaý bólimine jetkizilgen edi.
Jol apatyna kináli «Mercedes Benz G-55» júrgizýshisi kóp uzamaı ustaldy. Polıtsııanyń habarlaýynsha, er adam kólikti mas kúıinde júrgizgen.
