Almatyda jol apatynan 71 jastaǵy júrgizýshi qaza tapty
ALMATY. QazAqparat – Almatyda ál-Farabı dańǵylynda kólik apaty bolyp, 71 jastaǵy júrgizýshi qaıtys boldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, jol apaty Bostandyq aýdanynda boldy. «Nissan» kóliginiń júrgizýshisi ál-Farabı dańǵylymen batys baǵyttaǵy qozǵalys kezinde ótip bara jatqan kólikpen soqtyǵysyp qalǵan. Saldarynan avtomobıl aýdarylyp ketti.
«Róldegi 1951 jyly týǵan er adam oqıǵa ornynda qaza tapty. Atalǵan derek boıynsha QR QK 345-baby 3-bóligine sáıkes sot aldy tergeý bastaldy. Tıisti sot saraptamalary taǵaıyndaldy», - dedi Almaty qalasy PD anyqtaý basqarmasynyń bastyǵy Oljas Sháripov.
Oqıǵa ornynan túsirilgen vıdeo áleýmettik jelide paıda boldy.
