Almatyda jol apatyna túsken júkti áıel aman-esen bosandy
ALMATY. QazAqparat - Almatyda tolǵaǵy jetken júkti áıeldi alyp bara jatqan jedel járdem kóligi jol apatyna tústi, dep habarlaıdy QazAqparat tilshisi.
Qalalyq ІІD baspasóz qyzmetiniń aqparatyna súıensek, oqıǵa búgin Raıymbek kóshesi men Bókeıhanov kósheleriniń qıylysynda bolǵan. Jedel járdem brıgadasy perzenthanaǵa dereý jetkizý úshin dabyl belgisin qosa otyryp, joldyń qarsy baǵytyna shyqqan.
Al qalalyq Densaýlyq saqtaý basqarmasy júktiliktiń 39-shy aptasynda bolǵan kelinshek qatty tolǵaǵy qysyp, jedel járdem shaqyrtqanyn aıtty.
«Joldy qarsy baǵytyna shyqqan jedel járdem kóligi qarsy kele jatqan kólikke soǵylǵan. Oqıǵa ornyna basqa jedel járdem kóligi jiberildi. Júkti kelinshek ýaqytynda perzenthanaǵa jetkizilip, 15 mınýt ishinde tolǵatyp, dúnıege qyz balany ákeldi. Qazir sábıdiń de, onyń anasynyń da jaǵdaıy jaqsy», - dedi Densaýlyq saqtaý basqarmasynan.
ІІD-niń aıtýynsha, atalǵan jol apaty Jetisý aýdandyq ІІB-da tirkeldi. Endi qajetti protsessýaldyq sharalar men avtotehnıkalyq saraptama jasalatyn bolady.
