Almatyda jol apatyna kináli mas júrgizýshi tóbeles shyǵardy
ALMATY. QazAqparat - Almatyda jol apatyna kináli mas júrgizýshi tóbeles shyǵardy. Qalalyq polıtsııa departamenti oqıǵanyń mán-jaıyn túsindirdi, dep habarlaıdy QazAqparat tilshisi.
Jol apatyna ushyraǵan júrgizýshilerdiń tóbelesi áleýmettik jelide tarady.
Kadrlardan birneshe er adamnyń jol apatynan keıin sózge kelip qalǵanyn kórýge bolady, al kýágerler olardy arashalap júr.
«Almaty-Arasan shatqalyndaǵy jol apaty. «Mersedes» júrgizýshisi mas kúıde jol jıeginde turǵan eki kólikti qaǵyp ketti. Fýtbolkasyn sheship tastaǵan er adam tóbeles shyǵarmaq boldy», - delingen vıdeo sıpattamasynda.
Almaty Polıtsııa departamentiniń málimetinshe, jol apaty 5 shilde kúni shamamen keshki saǵat 17.00-de bolǵan.
«A. esimdi júrgizýshi jol qozǵalysy erejelerin, 2.4.2-bólimniń talaptaryn buza otyryp, mas kúıde «Mercedes» markaly kóligin basqaryp, Kazachka kóshesimen soltústik baǵytta kele jatyp «Mercedes» avtokóligimen soqtyǵysty, odan ári «BMW» markaly kóligin qaqty.
Jol-kólik oqıǵasy saldarynan eki avtomobılge de zaqym keldi. Zardap shekkender joq. Materıaldy Bostandyq aýdandyq polıtsııa basqarmasynyń qyzmetkerleri óndiriske aldy», - dedi Almaty qalasy PD anyqtaý basqarmasynyń basshysy Oljas Sháripov.
