Almatyda jol apaty kezinde jolaýshy mert boldy
ALMATY. QazAqparat - Almatyda jol apatynan júrgizýshi aman qalyp, salondaǵy jolaýshy qaıtys boldy, dep habarlaıdy QazAqparat tilshisi.
Qaıǵyly oqıǵa Shevchenko Jarokov kósheleriniń qıylysynda bolǵan.
Kýá bolǵandardyń aıtýynsha, Shevchenko kóshesimen batysqa baǵyt alǵan Shkoda Rapıd kóligi bordıýrge soǵylyp baryp, taldardy japyryp ótken. Sondaı-aq, mashına kóshege jaryq beretin sham baǵanyna soǵylyp toqtaǵan.
Sońynan kóliktiń motor bóligi tutana bastaǵan. Kólik mańaıyna jınalǵandar órtti ýshyqtyrmaı sóndirip úlgerdi.
Qatty soqqydan salondaǵy jolaýshy sol jerde kóz jumdy. Al, júrgizýshi jeńil jaraqat alǵan. Dárigerler ony úıine jiberdi.
