Almatyda joq páterlerdi «jalǵa berýmen» aınalysqan alaıaq áıel ustaldy
ALMATY. QazAqparat - Almaty qalasynda joq páterlerdi «jalǵa bergen» alaıaq áıel ustaldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, qazirgi tańda ınternet-alaıaqtyqpen aınalysyp, jábirlenýshilerge jarty mln teńgege jýyq shyǵyn keltirgen áıeldiń 11 faktisi dáleldendi.
Polıtsııa qyzmetkerleri ınternet keńistikte óziniń aram pıǵylyn júzege asyrǵan 36 jastaǵy áıeldi ustady.
Qala aýmaǵynda birneshe kúnnen beri ınternet-tehnologııalardy qoldaný arqyly jasalǵan qylmystar men quqyq buzýshylyqtardyń aldyn alý maqsatynda «Anti-Fraund» keń kólemdi is-sharasy júrgizilýde.
Alaıda, ońaı jolmen paıda tapqysy keletinderdiń quryǵyna ańǵal azamattar áli de túsýde, sonyń saldarynan olar úlken kólemdegi qarajatynan aıyrylýda.
Osylaısha, 1984 jyly týǵan azamatsha ınternet jelisinde qala aýmaǵynda joq páterlerdi arzan baǵamen jalǵa berý týraly jarnama berip, jábirlenýshilerden elektrondyq tólem júıesi arqyly aldyn ala tólem alyp, odan ári uıaly telefonyn sóndirip tastaǵan.
«Ol alaıaqtyq jolmen tapqan paıdasyn óziniń jeke basynyń muqtajdyǵyna jumsaǵan. Buǵan deıin, ol osyǵan uqsas qylmys jasaǵany úshin 2015 jyly sotty bolǵan. Alaıda, ol bostandyqqa shyqqannan keıin óziniń eski ádetine qaıta basqan», – deıdi Almaly aýdandyq polıtsııa basqarmasynyń bastyǵy Esen Ysqaqov.
Búgingi kúni kúdiktiniń 11 alaıaqtyq faktisi anyqtalyp, dáleldendi.
Jábirlenýshilerge keltirilgen shyǵynnyń jalpy somasy - 491 myń teńge. Kúdiktige qatysty QR QK 190-babynyń 3-bóligi boıynsha is qozǵaldy.
Sonymen qatar, osy áıeldiń qatysýymen jasalǵan alaıaqtyqtyń basqa da epızodtaryn anyqtaý jumysy júrgizilýde.
