Almatyda joq páterdi jalǵa berýshi alaıaq ustaldy
Almaty qalalyq polıtsııa departamentiniń málimetinshe, alaıaqtyq jasady degen kúdikke 27 jastaǵy T.esimdi áıel ilikti.
Ol jaýapkershilikten jaltarý úshin polıtsııa qyzmetkerleri urdy, sonyń saldarynan túsik tastadym dep ótirik aıtty.
«Anyqtalǵandaı, T.esimdi azamatsha ótken jyldyń jeltoqsan aıynda «Krysha» resýrsynyń saıtynda ózinde joq páterdi jalǵa berý týraly habarlandyrý ornalastyrdy. Bul jalǵan jarnamaǵa 26 jastaǵy S.esimdi azamat senip qalǵan. Kúdikti ózin «Marına» esimdi rıeltormyn dep tanystyrǵan T.esimdi azamatshanyń talaby boıynsha bank kartasyna 80 myń teńge aldyn ala tólem aýdarǵan.
Qarajatty alǵannan keıin T.esimdi azamatsha telefon nómirin óshirip, «klıentpen» baılanysqa shyǵýyn toqtatty», - deıdi Bostandyq aýdandyq polıtsııa basqarmasynyń bastyǵy Dýman Aýhadıev.
Polıtsııa ókiliniń aıtýynsha, jedel-izdestirý sharalary barysynda bank kartasynyń ıesi Ch.esimdi azamat ekendigi anyqtaldy, onyń aıtýynsha, ótken jyldyń qarasha aıynan beri onyń tanysy - T.esimdi azamatsha bank kartasyn qoldanyp júr.
«QR Qylmystyq-is júrgizý kodeksiniń 128 babyna sáıkes kúdikti ýaqytsha ustaý ızolıatoryna qamaldy. QR QK-niń 190 baby boıynsha qozǵalǵan qylmystyq is aıasynda onyń jeke basy basqa da qylmystarǵa qatysy bar-joǵyna tekserilýde.
«Sonymen qatar, T.esimdi azamatshanyń jaýapkershilikten jaltarý tásili retinde qoǵamdyq pikirdi burmalaý áreketine erekshe nazar aýdaramyn. Áleýmettik jelide áıel óziniń beınejazbasyn jarııalady, onda ol, bizdiń bólimsheniń qabyrǵasynda ózin soqqyǵa jyqqanyn, sonyń saldarynan túsik tastaǵanyn aıtty. Negizi bul shyndyqqa janaspaıtyn aqparat.
Keıinnen T.esimdi kúdikti ótirik aıtqanyn moıyndap, halyqtan keshirim surady», - dep túıindedi Dýman Aýhadıev.