Almatyda Jogorký Keneshtiń eks-depýtatyna qatysty istiń mán-jaıy belgili boldy
ALMATY. QazAqparat - Almatyda qylmystyq ister jónindegi mamandandyrylǵan aýdanaralyq sotynda arnaıy operatsııa barysynda ustalǵan Qyrǵyzstan Jogorký Keneshiniń burynǵy depýtaty Damırbek Asylbekulyna qatysty basty sot otyrysy ótti, Bul týraly «QazAqparat» HAA tilshisi habarlaıdy.
Damırbek Asylbekulymen birge sot aldynda taǵy 11 adam jaýap berýde. Basty sot qaraýy barysynda 37 jastaǵy Damırbek Asylbekuly anketalyq málimetterinde óziniń Qyrǵyzstan azamaty ekenin, úılengenin jáne ustalǵan ýaqytqa deıin Bishkekte turǵanyn baıandady.
Memlekettik aıyptaý nusqasy boıynsha, 2016 jyldyń qarasha aıynda Asylbekuly Qyrǵyzstan Parlamentiniń depýtaty bola tura, qyzmet babyn asyra paıdalanyp, materıaldyq paıda kórý, zańsyz aqsha tabý maqsatymen transulttyq uıymdasqan qylmystyq top quryp, ony basqarǵan. Top Qyrǵyzstannan Qazaqstanǵa jáne Reseıge asa iri kólemde jetkizilip turǵan turmystyq tutyný zattarynyń ekonomıkalyq kontrabandasymen aınalysqan.
Óz pıǵylyn keden arqyly kórineý jalǵan málimetter jazylǵan qujattar arqyly júzege asyrǵan. Memlekettik aıyptaýdyń málimetinshe, eks-depýtat Qazaqstandaǵy dostaryna kontrabandamen birge aınalysýdy usynǵan. Uıymdasqan qylmystyq topty ózi basqaryp, qaramaǵyndaǵy adamdarǵa tapsyrmalar berip otyrdy.
Memlekettik aıyptaýshylardyń aıtýynsha, kontrabandalyq taýardy Almaty qalasy boıynsha kedergisiz ótkizý úshin qylmystyq top úlken kólemde para berip kelgen.
Aıta keteıik, sot protsesine Qyrǵyzstan Parlamentiniń músheleri tyńdaýshy retinde qatysty.
Eske salaıyq, aǵymdaǵy jyldyń aqpan aıynda QR Bas prokýratýrasy, QR Ulttyq qaýipsizdik komıteti jáne Sybaılas jemqorlyqqa qarsy is-qımyl ulttyq bıýrosy Almaty, Jambyl, Ońtústik Qazaqstan oblystary men Almaty qalasynda arnaıy operatsııa júrgizip, 30-ǵa jýyq adam ustaldy. Olardyń arasynda keden organynyń, shekara qyzmetiniń laýazymdy tulǵalary, brokerler, deldaldar, sondaı-aq uıymdasqan qylmystyq top músheleri bar. Arasyndaǵy úsheýi Qyrǵyzstan azamaty. Onyń biri - Qyrǵyzstan Jogorký Keneshiniń depýtaty Damırbek Asylbekuly.
Keıin anyqtalǵandaı, Damırbek Asylbekulynyń Qazaqstan azamattyǵy bar. Bul rette, sottalýshynyń ózi Qyrǵyzstan azamaty ekenin atap ótýde.
Almaty soty tergeý kezinde Damırbek Asylbekulyn qamaýda ustaý merzimin birneshe ret uzartqan bolatyn.
