Almatyda joǵary tehnologııaly qoqys suryptaıtyn keshen iske qosyldy
ALMATY. QazAqparat - Almatynyń Alataý aýdanynda qýaty jylyna 550 myń tonna turmystyq qatty qaldyqty óńdeıtin qoqys suryptaý kesheni iske qosyldy, sonyń arqasynda polıgonda tek qana ınertti qaýipsiz jáne bıoydyraıtyn materıaldar kómiletin bolady, dep habarlaıdy QazAqparat.
Qala ákimdiginiń saıtynyń málimetinshe, kásiporynda qaıta óńdeý úshin 50 myń tonnaǵa deıin karton, tsellofan, áınek, plastıka, metall sııaqty zattar suryptalady. Bolashaqta keshen janynan shıkizattardy ekinshi qaıtara tereń óńdeý úshin qosymsha qýattardy jasaý josparlanǵan. Osynyń barlyǵy jáne qaldyqtardy óńdeýdi basqarýdyń keshendi júıesin engizý qalany qorshaǵan ortaǵa túsetin ekologııalyq júktemeni azaıtýǵa oıdaǵydaı yqpal etedi.
Megapolıs ákimi Baýyrjan Baıbek mundaı mańyzdy keshendi iske qosý tek qala úshin ǵana emes, jalpy elimiz úshin eleýli oqıǵa ekenin atap ótti.
«Memleket basshysy jańa tehnologııalardy engize otyryp kásiporyndardyń tıimdiligin ǵana emes, sonymen qatar ekologııalyq jaǵdaıyn jaqsartý qajettigin turaqty nazarda ustaýda jáne elimizde qabyldanǵan tsıfrlandyrý baǵdarlamasy da osy baǵytta júzege asýda. Bul keshen-ozyq tehnologııanyń úlgisi ári 2017 jylǵy EHSRO-nyń negizgi muralarynyń biri. Joba memlekettik-jekeshelik áriptestik qaǵıda boıynsha qolǵa alynǵan, 5,4 mlrd teńgege ınvestormen 25 jylǵa kelisim jasaldy, al qala óz kezeginde jer bólip, barlyq ınjenerlik kommýnıkatsııalardy júrgizdi», - dep atap ótti Baýyrjan Baıbek.
3,9 ga aýmaqqa ákimshilik blok, Ulybrıtanııada jasalǵan arnaıy tehnıkanyń garajy jáne ozyq ıtalıandyq qondyrǵylarmen jabdyqtalǵan negizgi óńdeý bólmeleri ornalasqan. Kásiporyndy iske qosý barysynda 530 turaqty jumys orny paıda boldy.
«Tártip» AQ-nyń basqarma tóraǵasy Aıbek Rahımov qala ákimshiligi men jeke ınvestorlar konsortsıýmy arasynda uzaq merzimge jasalǵan kelisim kásiporynnyń barynsha tıimdi jumys atqaratynynyń ozyq modeli bolatyndyǵyn aıtty. Qazirgi kezde «Tártip» AQ TQQ-dyń 70%-yn qamtıdy. Kompanııada 236 tehnıka bar, qoqys tasymaldaıtyn barlyq kólikterde GPS júıesi jumys isteıdi, planshetter arqyly qoqys alańyndaǵy jaǵdaılar túgel kórinedi. Uzaq merzimdi kelisimniń negizgi tarmaqtarynyń biri avtoparkti únemi jańartý jáne jumys protsessin avtomattandyrý bolyp tabylady. Qazirdiń ózinde eýro-4 standartynyń 30 mashınasy satyp alyndy jáne baǵyttardy dıspetcherleý júıesi engizildi.
