Almatyda joǵary órt qaýpi saqtalady
«Qazgıdromet» kásipornynyń málimetinshe, 24-26 shilde aralyǵynda Almatyda synap baǵanasy 35-38 gradýsqa deıin kóteriledi. Kún qatty ystyq bolýy yqtımal. Almaty qalasynyń Tótenshe jaǵdaılar departamenti qalada órt qaýipi saqtalatynyn málimdedi. Osyǵan baılanysty vedomstvo tómendegi qaýipsizdik sharalaryn saqtaýdy usynady:
- Taýǵa demalýǵa barǵan jaǵdaıda tutanǵan temeki qaldyqtaryn tastamańyz;
- Bir jelige birneshe elektr qurylǵyny qospańyz, óıtkeni elektr jelisiniń shamadan tys júktelýi qysqa tuıyqtalýǵa jáne órtke ákelýi múmkin;
- Balalardy kóliktiń ishine az ýaqytqa bolsa da qaldyrýǵa bolmaıdy;
- Kún sáýlesi tikeleı túsetin jerlerde múmkindiginshe az bolýǵa tyrysyńyz.
Órt qaýipti kezeńde Almaty qalasy TJD aldyn alý sharalaryn kúsheıtti
«Taýly ormandy jerlerde órttiń aldyn alý maqsatynda bekitilgen patrýldeý kestesine sáıkes demalys jáne mereke kúnderi orman sharýashylyǵy mekemeleri men JPQ ókilderimen birlesken reıdtik is-shara ótkizedi»,- dep habarlady departamentten.
