Almatyda joǵary oqý oryndarynyń rektorlary men prorektorlarynyń tájirıbelik semınary ótedi
ALMATY. 25 aqpan. QazAqparat /Erlik Erjanuly/ - Almatyda 28 aqpanda "Zertteýshi joǵary oqý oryndary men ınnovatsııalar - Qazaqstanda brıtan tájirıbesin qoldaný múmkindikteri" degen taqyrypta joǵary oqý oryndary rektorlary men prorektorlarynyń tájirıbelik semınary ótedi.
Ony Bilim jáne ǵylym mınıstrliginiń qoldaýymen British Council men Ál-Farabı atyndaǵy Qazaq ulttyq ýnıversıteti birigip uıymdastyryp otyr. Bul shara British Council dırektory, Qazaqstandaǵy Ulybrıtanııa Elshiliginiń Mádenıet jáne bilim jónindegi attashesi Lına Mıloshevıchtiń qatysýmen ashylmaq. Ony júrgizý úshin ulybrıtanııalyq sarapshylardan - QS World University Rankings reıtıng agenttiginiń aımaqtyq dırektory Zoıa Zaıtsev, Middlesex ýnıversıtetiniń bilim transferti jáne kásibı damý departamentiniń dırektory, joǵary oqý orny janyndaǵy ǵylymı-zertteý ortalyǵyn qurý jónindegi sarapshy Mark Greı shaqyrylyp otyr.
Bul semınarda kóterilgen taqyryptar 2-3 naýryzda «Almaty» SPA saýyqtyrý kýrortyndaǵy basqosýda odan ári jalǵaspaq. Onda Ulybrıtanııadaǵy jetekshi zertteýshi joǵary oqý oryndarynyń qalyptasýy men olardaǵy zertteý men ınnovatsııalardy basqarý tetikteri týraly maǵlumattar beriledi. Semınarda álemdik reıtıng agenttikterinde qoldanylatyn ólshemderge jeke sessııa arnalyp otyr.
