Almatyda joǵary oqý oryndaryn oqýlyqtarmen qamtamasyz etý máselesine arnalǵan VIII respýblıkalyq konferentsııa ótedi

Bul týraly QR Joǵary oqý oryndary qaýymdastyǵynyń baspasóz qyzmeti habarlady.

Konferentsııany Qazaqstan Respýblıkasy Joǵary oqý oryndary qaýymdastyǵy Qazaqstan Respýblıkasy Bilim jáne ǵylym mınıstrliginiń jáne Qazaqstannyń joǵary oqý oryndarynyń qoldaýymen uıymdastyryp otyr.

Joǵary oqý oryndaryn oqýlyqpen qamtamasyz etý máselesi boıynsha jyl saıyn uıymdastyrylatyn konferentsııalardyń maqsaty joǵary oqý oryndaryna arnalǵan kitap ónimderin ǵylymı turǵyda saraptan ótkizip, daıyndaý, aýdarý, basyp shyǵarý máselelerin ortaǵa salý.

Konferentsııa jumysyna Bilim jáne ǵylym vıtse-mınıstrliginiń ókilderi, JOO-lardyń rektorlary men ǵalymdary, kitaphana dırektorlary, baspagerler, oqý-ádistemelik bólimderdiń mamandary, jańa shyqqan oqýlyqtardyń avtorlary men avtorlyq ujymdar, aýdarmashylar, jalpy zııaly qaýym men buqaralyq aqparat quraldarynyń ókilderi qatysady. Konferentsııa barysynda taqyryptyq baıandamalar jasalyp, talqylaýlar ótedi.

Konferentsııa aıasynda 2011-2012 jyldary memlekettik tapsyryspen jaryq kórgen oqýlyqtar men Almaty qalasyndaǵy joǵary oqý oryndarynyń óz avtorlary daıyndap shyǵarǵan kitaptardyń kórmesi jáne birqatar úzdik oqýlyq avtorlary men baspa isin uıymdastyrýshylardy marapattaý rásimi ótedi.

Uıymdastyrylyp otyrǵan konferentsııanyń basty ereksheligi, sońǵy kezderi elimizdegi joǵary oqý oryndaryn oqýlyqtarmen qamtamasyz etý máselesi sapalyq deńgeıge kóshkendigi bolyp otyr. Jyl saıyn elimizdegi kitaphanalyq qorlar ǵylymnyń negizgi salalary boıynsha memlekettik tildegi oqýlyqtarmen tolyqtyrylyp keledi. Sońǵy 3 jylda memlekettik tilde jazylǵan 200 túrli atalymdy qamtyǵan oqýlyqtar jaryqqa shyqty. Munyń syrtynda úzdik shetel ǵalymdarynyń oqýlyqtary memlekettik tilge aýdaryldy.