Almatyda joǵalyp ketken jigit esinen aıyrylyp qalǵan
ALMATY. QazAqparat - Almatyda 8 kúnnen beri iz-túzsiz joǵalyp ketken jigit Aqtóbe qalasynan tabyldy, dep habarlaıdy QazAqparat tilshisi.
Jigittiń ápkesi Baıan Seıitovanyń aıtýynsha, Temirhan esinen aıyrylyp qalǵan. Temirhan Iman-Zulpar óziniń Aqtóbege qalaı kelgeninen múlde beıhabar.
Jigittiń jaqyndary balanyń Aqtóbede ne istep júrgenine ań-tań. Otbasynyń Aqtóbede eshqandaı týystary nemese tanystary joq.
«Aqtóbege qalaı kelgenin bilmeıdi. Biraq áıteýir anamyzdyń telefony esinde eken. Soǵan qońyraý shalypty. «Mama, men jumysqa bara jatyr edim ǵoı» depti. Esinde múlde eshteńe joq», - dedi Baıan Seıitova.
Qazir Temirhan Aqtóbe qalasyndaǵy ІІD polıtsııa bólimshesinde otyr. Ata-anasy ony alyp ketýge jolǵa shyqty.
Jigittiń týǵandary bul oqıǵaǵa baılanysty polıtsııaǵa aryzdanbaq.
Aıta ketý kerek, 23 jastaǵy Temirhan Iman-Zulpar Aıtýǵanuly 6 aqpanda úıinen shyǵyp ketip, sodan qaıtyp oralmaǵan edi.
