Almatyda joǵalyp ketken 2 jasar búldirshin tabyldy
ALMATY. QazAqparat – Almaty polıtsııasy joǵalyp ketken 2 jasar balany taýyp, ata-anasyna tapsyrdy, dep habarlaıdy QazAqparat tilshisi.
Qalalyq Polıtsııa departamentiniń habarlaýynsha, polıtsııanyń kezekshi pýltine Bekmahanov pen Súıinbaı kóshesiniń qıylysynda ornalasqan janarmaı quıý beketiniń janynan eki jasar balanyń qaraýsyz júrgendigi týraly habarlama kelip tústi.
«Búldirshindi taýyp alǵan adamdardyń aıtýynsha, ul bala ózi týraly eshteńe aıta almaǵan. Dabylǵa birinshi bolyp № 92 PPB ýchaskelik polıtsııa ınspektorlary jaýap berdi. Aldymen jaqyn mańdaǵy jeke sektordy, turǵyn aýdandy tekserdi. Turǵyndarmen suhbat júrgizildi. Turǵyndardyń biri sábıdi tanydy. Onyń esimi – Andreı. Bizdiń qyzmetkerler áıeldiń kómegimen balanyń týystaryn tapty. Andrıýshanyń anasy óz kezeginde poshtaǵa az ýaqytqa ketkenin jáne ulyn úlken qyzyna qaldyrǵanyn aıtty», – dedi Túrksib aýdandyq polıtsııa basqarmasynyń bastyǵy Erkin Amantaev.
Óz kezeginde, balanyń anasy polıtsııa qyzmetkerlerine alǵysyn bildirdi.
«Men búgin balamnan kóz jazyp qaldym.Túrksib aýdanynyń polıtsııa qyzmetkerleri men kámeletke tolmaǵandar isi jónindegi ınspektorlardyń arqasynda ol aman-esen tabyldy. Rahmet», – dedi Andreıdiń anasy.
