Almatyda joǵalǵan ózbekstandyq qarııa Taraz qalasynan tabyldy
ALMATY. QazAqparat - Almatyda qyzyna qonaqqa kelip, joǵalyp ketken ózbekstandyq qarııa Tarazdan tabyldy, dep habarlaıdy QazAqparat tilshisi.
65 jastaǵy Ózbekstan azamaty Bekjan Begıev 1 shilde kúni kúndizgi 10:30-dar shamasynda Alataý aýdany Mádenıet aýylyndaǵy jer úıden shyǵyp ketken.
Jaqyndary ony kóshede serýendep qaıtýǵa shyqqan bolar dep alańsyz otyryp qalǵan. As daıyn bolǵanda, er adamdy shaqyrmaq bolǵan týystary ony esh jerden taba almaǵan.
Belgili bolǵandaı, er adam aýladan shyǵyp ketken soń úıdi qaıtadan taba almaı qalǵan.
Adasqan qarııa Almatydaǵy Saıran avtovokzalyna jetip alyp, sonda túnegen.
«Esinde tek Tarazdaǵy inisiniń mekenjaıy bolǵandyqtan, ol kisi tikeleı Tarazǵa ketip qalǵan. Bizge ózi sol jaqtan «aman-esen jettim» dep habarlasty», - dedi týystary.
Al Almatydaǵy qyzy men jekjattary 65 jastaǵy er adamnyń joǵalyp ketkeni týraly Alataý aýdandyq ІІB-ne aryzdanyp úlgergen.
