Almatyda joǵalǵan boıjetkendi tanysy kúshtep ustaǵan
ALMATY. QazAqparat - Almatyda 2 qazan kúni joǵalyp ketken 19 jastaǵy Dıana Sovetqan tabyldy.
Anyqtalǵandaı, ony 4 kún boıy tanysy qamap qoıyp, qınap ustaǵan.
Qyzdyń aǵasy Rashıd Tursynovtyń aıtýynsha, polıtsııa Dıanany GPS-navıgatory arqyly tapqan.
«Dıanany Baǵanashyl aýylynan taptyq. Ony jigiti urlap ketken. Telefonyn qolyna bermeı qoıǵan. Olardy aýdandyq ІІB alyp ketti. Dıana ol jigitpen saıt arqyly tanysyp, birneshe aı boıy habarlasyp kelgenin aıtty», -dedi Rashıd.
Onyń aıtýynsha, jigittiń Dıanany ne úshin urlaǵany áli belgisiz.
«Úılený týraly aralarynda sóz bolmaǵan. Polıtsııa suraqtyń astyna alǵannan keıin ǵana, ol úılengisi kelgenin aıtypty. Al 4 kún boıy qamap ustaǵanda, ondaı sóz bolmaǵan. Dástúr boıynsha, qyzdy alyp qashqannan keıin, qudalar «aıaqqa jyǵylyp» bir táýlik ishinde keledi. Bul onyń qateligi», - dedi R.Tursynov.
Eske sala keteıik, Dıana Sovetqannyń joǵalǵany týraly týystary 2 qazan kúni habarlaǵan bolatyn. Ol úıden jumysyna ketip, oralmaǵan. Dıana «Mamyr» shaǵynaýdanynda bala kútýshi bolyp jumys jasaǵan. Qyzdy izdeýge 20 erikti tartyldy.
