Almatyda JMS aıasynda salynatyn dárethananyń quny belgili boldy
ALMATY. QazAqparat - Almatyda jeke menshik-memlekettik seriktestik aıasynda salynatyn bir dárethana quny 10 mln. teńge bolmaq.
Bul týraly Bostandyk Invest forýmynda Almaty qalasy ákiminiń orynbasary Erlan Áýkenov aıtty, dep habarlaıdy QazAqparat tilshisi.
«Bul másele nege shyǵyp otyr? Adamdar qysta parkte qydyrǵanda jyly dárethananyń joqtyǵyna shaǵymdanady. Osydan keıin, biz kóp aryz-shaǵym túsken jerlerdi anyqtap, osy ispen aınalysatyn astanalyq kompanııaǵa shyqtyq. Olar bas tartty. Sebebi, munyń shyǵyny kóp eken, eń tómengi baǵamen eseptegende bir dárethana 10 mln. teńgege shyǵyp otyr. Tipti, 100 dárethana jasatsań da shyǵyny birdeı», - dedi Erlan Áýkenov.
Qala ákimi orynbasarynyń aıtýynsha, jergilikti bılik dárethana salyp beretin ınvestor tapqan. Oǵan bólinetin jer memleket menshiginde qalady. Kásipkerge jalǵa beriledi.
«Kásipker táýekelge barady. Al, halyq úshin avtoturaq aımaǵynda taza, jyly dárethana bolady. Biz qazir ekeýin ornattyq, aldaǵy eki aptada 7-eýin salamyz», - dedi ol. Sonymen qatar, qala ákiminiń orynbasary óz sózinde Almatydaǵy dárethanalar Astana, Máskeýdegideı bolý kerektigin, biraq ol úshin 5-10 mln. teńge qajettigin de qosa ketti.
«Biz bul jumysta Máskeýdiń úlgisin aldyq. Eger muny memleket salatyn bolsa, onda birinshi jobalyq-smetalyq qujattamasyn ázirleýge tapsyrys beriledi. Onyń jumysy bitken soń, salýǵa aqsha bólý kerek bolady. Bul úshin eń jyldam ázirlendi degenniń ózinde 1,2 jyl ýaqyt ketedi. Máskeýde qalaı istegen? Jeke menshik-memlekettik seriktestik arqyly, túpkilikti satyp alýǵa shekteý qoıyp saldyrǵan. Kásipker ózi salady, ózi tabysyn tabady», - dedi E.Áýkenov.
«Jeke menshik-memlekettik seriktestik kólegeıli aqsha aınalymyn azaıtady, senimdi basqarmaǵa tabystaǵan kúnde bıýdjet júktemesin azaıtady», - dep sózin túıindedi E.Áýkenov.
