Almatyda JQTB indetine qarsy kúres aılyǵy ótedi

ALMATY. Qarashanyń 11-i. QazAqparat /Ádilet Musahaev/ - Almatyda JQTB ortalyǵy «Kópshiliktiń qoljetimdiligi jáne adam quqyǵy» taqyrybynda  ótkiziletin  dúnıejúzilik JQTB-men kúres naýqany aıasynda aılyq ótkizedi.

Ol týraly uıymdastyrýshylar búgin bolǵan baspasóz máslıhatynda málim etti, dep habarlaıdy QazAqparat.

Atalmysh shara qarashanyń 10-y men jeltoqsannyń 10-y aralyǵynda ótedi.

«Osy aılyqtyń maqsaty - qoǵamnyń osy indetke qarsy kúreske  nazaryn aýdartyp,  aqparattyq jumystar júrgize otyryp, jastar men jasóspirimder arasynda ornyqty minez-qulyq qalyptastyrý. Sonymen qatar, ártúrli is-sharalar uıymdastyrmaqpyz. Orta jáne joǵary oqý oryndarynda sporttyq oıyndar, eń úzdik teatrlandyrylǵan kórinister, KTK jáne dóńgelek ústelder ótkiziledi. Qalanyń ónerkásip oryndary men saýda-sattyq ortalyqtarynda radıodárister oqylyp, ártúrli únparaqtar, qorǵaný zattary taratylady», deıdi Almaty JQTB ortalyǵynyń epıdemıolog-dárigeri Aınur Jandybaeva.