Almatyda JITS-ke qarsy aılyq bastaldy
ALMATY. QazAqparat – Almatyda juqtyrylǵan ımmýnıtet tapshylyǵynyń sındromyna ( JITS) qarsy aılyq bastaldy, dep habarlaıdy QazAqparat tilshisi.
«SOVID-19 pandemııasy ár adamnyń qaýipsizdigine baılanysty ekenin aıqyn kórsetti. AITV-men ómir súretin adamdarǵa qatysty stıgma men kemsitýshilikti joıý, barlyq muqtaj jandardy qajetti dári-dármektermen jáne qyzmettermen qamtamasyz etý, adam quqyqtary men genderlik teńdikke negizdelgen tásilderdi paıdalaný - AITV jáne COVID-19 pandemııasyn toqtatýdyń basty sharttary», - deıdi Almaty qalasy JITS-tyń aldyn alý jáne oǵan qarsy kúres ortalyǵynyń bas dárigeri Marat Tókeev.
Aılyq aıasynda JITS ortalyǵynyń dárigerleri qoǵamdastyqtarmen jáne úkimettik emes uıymdarmen birlesip, halyqtyń medıtsınalyq saýattylyǵyn arttyrýǵa jáne AITV ınfektsııasy men COVID-19 aldyn alý sharalaryna baǵyttalǵan túrli is-sharalar ótkizedi.
Árbir almatylyq áleýmettik jelilerde tanymal ánshi Irına Dýbtsovanyń «Jıvı» ániniń eń jaqsy kaver nusqasy baıqaýyna qatysa alady. Jeńimpazdardy onlaın daýys berý arqyly anyqtaıdy, eń úzdik kaverler syılyqtarmen marapattalady.
Al, qala oqýshylary Tık-Tok áleýmettik jelisinde óz talanttaryn kórsete otyryp, «AITV-ǵa qarsy bı» chellendjine qatysa alady.
AITV-men (AÓA) ómir súretin adamdarǵa stıgma men kemsitýshilikke jol bermeý maqsatynda ortalyqtyń medıtsınalyq qyzmetkerleri basqa mekemelerdegi áriptesterin «Yntymaqtastyq tanytyńyz!» onlaın fleshmobyna shaqyrady.
Megapolıs turǵyndarynyń nazaryn AITV-ınfektsııasynyń aldyn alýdyń, óz densaýlyǵy men jaqyndarynyń densaýlyǵy úshin jaýapkershiliktiń mańyzdylyǵyna aýdarý úshin áleýmettik jelilerde qum shoýynyń elementteri bar áleýmettik rolık kórsetiletin bolady.
Testileýdi tanymal etý jáne AITV-nyń berilý joldary týraly habardar bolý úshin JITS ortalyǵynyń qyzmetkerleri dárigerlerge, polıtseılerge, pedagogtarǵa, áskerı qyzmetshilerge, qylmystyq-atqarý júıesiniń qyzmetkerlerine, aýtrıch-qyzmetkerlerge onlaın rejıminde trenıngter men semınarlar ótkizedi.
S. Asfendııarov atyndaǵy Qazaq Ulttyq medıtsına ýnıversıtetiniń stýdentterine arnalǵan «AITV jáne stıgma» atty onlaın-debattar josparlandy. Halyqtyń negizgi toptary úshin AITV-ǵa jedel testileýmen «Biz salaýatty ómir saltyn qoldaımyz» aktsııasy, al AÓA úshin – «N=N» (Anyqtalmaıtyn = berilmeıtin) vebınaryn ótkizý kózdelgen.
2020 jyldyń birinshi qarashasyndaǵy jaǵdaı boıynsha Almaty qalasy JITS ortalyǵynda 3663 AÓA esepte tur. Sońǵy jyldary jynystyq jolmen berilýdiń ósý tendentsııasy baıqalýda.
