Almatyda jiti respıratorlyq vırýsty ınfektsııa juqtyrǵan balalar kóbeıdi

ALMATY. QazAqparat - Almatyda jiti respıratorlyq vırýsty ınfektsııa (JRVI) juqtyrǵandar sany kúrt ósti. Bir aptada 24 myńǵa jýyq jaǵdaı tirkeldi.

Bul týraly Óńirlik kommýnıkatsııalar qyzmeti alańynda ótken baspasóz máslıhatynda qalalyq sanıtarlyq-epıdemıologııalyq baqylaý departamenti basshysynyń orynbasary Ásel Qalyqova málim etti, dep habarlaıdy QazAqparat tilshisi.

Onyń aıtýynsha, ótken aptada Almaty qalasynda JRVI, tumaý aýrýlarynyń 23 995 jaǵdaıy tirkeldi.

«Bul aýrýmen naýqastanǵandardyń 65,7% balalar. Tumaýdy 110 adam juqtyrǵan, onyń ishinde «V» túrin 109 adam, «A» túrin (H3N2) 1 adam juqtyrǵan, barlyq naýqastar em qabyldady, jaǵdaılary qanaǵattanarlyq», - dep atap ótti Ásel Qalyqova.

Spıker vaktsınatsııanyń halyqty tumaý vırýsyn juqtyrýdan qorǵap qana qoımaı, asqynýlar men ólim-jitim deńgeıin aıtarlyqtaı tómendetýge kómektesetinin eske saldy.

2022 jylǵy 30 qarashadaǵy jaǵdaı boıynsha tumaýǵa qarsy 223 349 adam ekpe aldy, onyń ishinde 210 000 adam «qater» tobynda (100%).

Sondaı-aq, ol jekemenshik medıtsınalyq ortalyqtarda óz qaltasynan tólep, ekpe alǵysy kelgen basqa turǵyndarǵa jáne ártúrli salalarda eńbek etetinderge jumys berýshiler esebinen tumaýǵa qarsy ekpe júrgizilýde.

Qala boıynsha 9698 adam jumys berýshiler esebinen vaktsınatsııalansa, 3651 adam óz qarjysyna vaktsına saldyrdy.

Ásel Qalyqova qala turǵyndaryn JRVI jáne tumaýmen syrqattanýshylyqtyń órshýi kezeńinde spetsıfıkalyq profılaktıkadan basqa spetsıfıkalyq emes profılaktıkanyń jalpy sharalaryn saqtaýdy usyndy:

- JRVI-men naýqastanǵan adamdardan aýlaq bolyńyz, al eger baılanysý qajet bolsa, onda maska kıip, oksolın maıyn qoldanyńyz;

- aýrýǵa shaldyqqan jaǵdaıda úıde bolý, ózin-ózi emdeýmen aınalyspaý, medıtsına qyzmetkerin shaqyryp, otbasy ortasynda nemese ujymda bolǵan kezde maska kııý, dárigerdiń taǵaıyndaýy boıynsha em alý qajet;

- túshkirý jáne jótel kezinde aýzyńyzdy qolyńyzben, maılyqpen, oramalmen jaýyp, qolyńyzdy múmkindiginshe jıi jýyńyz;

- ımmýndyq júıeni arttyrý: S vıtamınin jáne dárigerdiń usynysy boıynsha basqa dári-dárimekterdi qoldaný;

- qashyqtyqty saqtaý, kóp adam jınalǵan is-sharalarǵa qatysýdy azaıtý qajet, ásirese JRVI, tumaý aýrýynyń kóterilýi kezeńinde, úı-jaılardy ylǵaldy tazalap, jeldetý kerek;

- syrqattanǵan balalardy uıymdastyrylǵan ujymdarǵa, mektepke deıingi balalar mekemelerine jibermeý.