Almatyda «Jigitter» kvartetiniń eki birdeı án jınaǵy jaryq kórdi

Keshe Almatyda atalmysh úntaspalardyń tusaýy kesildi. Tusaýkeser rásimine Qazaqstan estrada juldyzdary, aqyn - jazýshylar men sazgerler jáne «Jigitter» tobynyń ánderin súıip tyńdaıtyn óner súıer qaýym qatysty. Olar topty jańa án jınaǵymen quttyqtap, jyly lebiz-tilekterin bildirdi.

Esterińizge sala ketsek, «Jigitter» kvartetiniń alǵashqy «Erke qyz» dep atalatyn tuńǵysh án jınaǵy 2006 jyly shyqty. Al, ekinshi «Baqytty bol» dep atalatyn án jınaq bir jyldan soń, ıaǵnı 2007 jyly shyqqan bolatyn. Endi, mine tórt jyl salyp toptyń eki bólimnen turatyn án jınaqtary shyǵyp otyr.

«Ár úntaspada on alty ánnen toptastyrylǵan. Bireýinde jastarǵa arnalǵan oınaqy, kóńildi ánder bolsa, ekinshi albomǵa túgelimen baıaý aıtylatyn yrǵaqty ánderdi, máselen «Balqadısha», «Aıqarakóz», «Jas qalam» sekildi ánderdi engizdik. Bunymen qatar, úntaspada tyńdarmandarǵa buǵan deıin usynylmaǵan jańa ánder bar»,-dedi «Jigitter» kvartetiniń prodıýsseri Erǵalı Ábdiraıymov.

Tusaýkeser barysynda: «Bes - alty jyldyń ishinde top úlken jetistikterge jetip, tanymal topqa aınaldy. Toptardyń ishinen top jaryp, qazaq estardasynda erekshe ornyn aldy. Top qurylǵannan bergi ýaqyttan óz tyńdarmandaryn taýyp úlgerdi. Búginde «Jigitter» tobyn búkil el tanıdy. Olardyń ánderi qazaq jurtynyń yqylasyna bólendi», -dep atap ótildi.