Almatyda jezókshelikpen aınalysýdy uıymdastyrǵan úsh áıel ustaldy
ASTANA. Aqpannyń 10-y. QazAqparat /Aıdar Ospanalıev/ - Aqpannyń 8-i kúni Almatylyq polıtseıler qalada jezóksheler qyzmet kórsetetin oryn uıymdastyrǵan 3 áıeldi ustady.
Bul týraly búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń derekterine qaraǵanda, ustalǵan 3 áıeldiń úsheýi de Almaty qalasynyń turǵyndary bolyp shyqty. Olar ózderiniń qylmystyq áreketterin qalada jalǵa alǵan páterlerdiń birinde júzege asyrǵan. Atalmysh páterden kámeletke tolmaǵan eki jasóspirim qyz tabyldy. Olardy jynoınaqty uıymdastyrýshylar uryp-soǵyp, ótken jyldyń jeltoqsan aıynan beri qamaýda ustap, jezókshelikpen aınalysýǵa májbúrlegen. «Qyzdardy ustalǵan áıelderdiń biri elektrdiń kómegi arqyly denege zaqym keltiretin qarýmen qorqytyp, zorlap alyp kelgen. Arnaıy operatsııa barysynda qamaýda jatqan kámeletke tolmaǵan qyzdar bosatylyp, ustalǵandarǵa «adam urlap, ony bostandyǵynan aıyrdy, prıton uıymdastyrdy, jezókshelikpen aınalysýǵa májbúrledi» degen birneshe aıyptaýlar boıynsha qylmystyq is qozǵaldy», dedi departament bastyǵy.
