Almatyda jezóksheler ordasyna aınalǵan taǵy bir qonaq úı áshkerelendi (FOTO)
ALMATY. QazAqparat - Almatyda jezóksheler ordasyna aınalǵan taǵy bir qonaq úıdiń ákimshiligi áshkerelendi. Bul týraly búgin Almaty qalalyq ІІD baspasóz qyzmetinen habarlady.
Jedel polıtsııa qyzmetkerleriniń anyqtaǵanyndaı, «Aınabulaq» shaǵyn aýdanynda ornalasqan qonaq úılerdiń birinde tán saýdasymen eki áıel men eki erkek aınalysyp kelgen. Olar osy qonaq úıdiń bir bólmesin jezóksheler ordasyna aınaldyrǵan.
«Bizdiń bólimsheniń qyzmetkerleri shamamen 22 saǵat 30 mınýtta osy qonaq úıde jedel-izdestirý sharalaryn júrgizý barysynda 32 jáne 45 jastaǵy eki áıel men 1985 jáne 1986 jyly týǵan eki er azamatty, sondaı-aq, 10 jeńil júristi qyzdardy ustady.
Іs júrgizý barysynda tergeý-jedel toby kúdiktilerden 177 myń teńge tárkiledi. Bul, boljam boıynsha qylmystyq jolmen tabylǵan aqshalar. Ustalǵan tulǵalardyń áreketine QR Qylmystyq Kodeksiniń 309-baby, 2-shi tarmaǵynyń 1-shi bóliminde qarastyrylǵan (Jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq) normalar boıynsha baǵa beriledi», - dedi Almaty qalalyq ІІD Uıymdasqan qylmysqa qarsy kúres jónindegi basqarma bastyǵy Erlan Oralbekov.
Aıta ketelik, Almaty polıtsııasynyń málimetinshe, bıylǵy jyldyń basynan beri jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq boıynsha (QR QK 309-baby) - 22 derek, jezókshelikpen aınalysýǵa tartý boıynsha (QR QK 308-baby) - 14 derek, kámeletke tolmaǵandardy jezókshelikpen aınalysýǵa tartý boıynsha (QR QK 134-baby) - 4 derek jáne adam saýdasy boıynsha (QR QK 128-baby) - 2 derek tirkeldi.
