Almatyda «Jetisý» qazaqstan-qytaı shekarasyna monıtorıng júrgizýdiń óńirlik ortalyǵy ashyldy

Saltanatty sharaǵa QR Qarjy mınıstri Bolat Jámishev jáne QR Qarjy mınıstrligi Kedendik baqylaý komıtetiniń tóraǵasy Qozy-Kórpesh Kárbozov qatysty.

Ashylý rásiminde onlaın-rejımde Qytaımen memlekettik shekaradaǵy ótkizý pýnktterindegi keden beketteriniń jumysy kórsetildi jáne Qyrǵyzstan, Túrikmenstan, Ózbekstanmen aradaǵy shekarany beınebaqylaý ortalyqtarynyń jumystary tanystyrylyp, túsindirildi.

Bolat Jámishevtyń aıtýynsha, atalmysh monıtorıng júrgizý ortalyǵy Qazaqstan shekarasyndaǵy barlyq kedendik beketterdiń jumystaryn, barlyq úderisterdi baqylaýǵa, keden erejelerin buzý áreketterin anyqtaýǵa, sybaılas jemqorlyqtyń yqtımal kórinisterin boldyrmaýǵa, sonymen qatar, shekaradaǵy shtattan tys jaǵdaılarǵa jedel is-áreket etýge múmkindik beredi.

«Ortalyqqa eki áýejaı, shekaralardaǵy temirjol jáne avtokólik joldary qosylǵan. Barlyq nysandarda beınekameralar ornatylǵan. Máselen, avtokólik ótkende birden onyń kólik nómiri, salmaǵy, kólik jaıyndaǵy barlyq aqparattar, qujattary jazylyp shyǵady jáne onyń áketip bara jatqan taýarlary jaıyndaǵy aqparattar da birden tirkeledi. Osylaısha, barlyq málimetter birden monıtorıng ortalyǵyna túsip otyrady. Mundaı baqylaý kólik quraldarynyń kirý men shyǵýyn jáne onyń qujattarynyń bar-joǵyn anyqtaýǵa múmkindik beredi»,-dep túsindirdi mınıstr.

Onyń aıtýynsha, endi, kólikterge arnaıy elektrondyq plomba qoıylyp, al júrgizýshiler arnaıy «seıf-paket» qoldanatyn bolady. Búginde shekaradan ótý protsesi 15 mınýtqa qysqarǵan.

Ol sonymen qatar, ashylý rásiminde bıylǵy jyly kedendik beketter táýlik boıy jumys túrine kóshetin bolady dep habarlady.

«Shekaralyq monıtorıng ortalyqtarynyń ashylýy memleket múddesi úshin de, bıznes ókilderi úshin de artyqshylyqtar beretini sózsiz. Memleket úshin - kiristerdi tolyq óndirip almaý problemalaryn joıýǵa, saýda kásiporyndarynyń talaptardy qatań oryndaýǵa, zamanaýı tehnologııalardy qoldanýǵa, resýrstardy tıimdi jáne ońtaıly bólýge múmkindik beredi. Bıznes úshin - shyǵyndardy tómendetýge, kedendik tazalaýdy jáne jóneltýge ruqsat alýdy tezdetýge, erejelerdi túsinikti túrde talqylaý jáne qoldanýǵa, resýrstardy neǵurlym tıimdi jáne ońtaıly bólýge múmkindik beredi»,-dedi Kedendik baqylaý komıtetiniń tóraǵasy Qozy-Kórpesh Kárbozov ortalyqtyń ashylý rásiminde.