Almatyda jeti adam tabıǵı gazdan ýlanyp qaldy
ALMATY. QazAqparat – Almatyda jylytý maýsymy bastalǵaly, 7 adam tabıǵı gazdan ýlanyp qaldy. Bul týraly onlaın brıfıng barysynda Almaty qalasy TJD zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarma bastyǵynyń mindetin atqarýshy Talǵat Dúısebaev aıtty, dep habarlaıdy QazAqparat tilshisi.
«Qatty otynmen jylytylatyn úılerdiń sany azaıǵanymen, tabıǵı gazben ýlaný qaýpi artyp keledi. Sonymen, qyrkúıek aıynyń basynan bastap, aǵymdaǵy jylytý kezeńinde 7 adam tabıǵı gazdan ýlanyp úlgerdi, onyń 3-ýi bala . Sondaı– aq, 4 adam qatty otyn (kómir) peshiniń kómirtegi totyǵynan ýlandy, onyń 2-ýi bala», - dedi Talǵat Dúısebaev.
Onyń aıtýynsha, osyǵan baılanysty, Turǵyn úı saıasaty basqarmasy men «QazTransGazAımaq» AQ- na «Gaz taratý júıeleri» 8.12 tarmaǵyna sáıkes, gaz júıeleri men jabdyqtaryn tek qana gazdyń aǵyp ketý datchıkteri (gaz analızatory) bolǵan jaǵdaıda ǵana paıdalanýǵa berý usynyldy.
Sonymen qatar, Almaty qalasy Tótenshe jaǵdaılar departamenti turǵyndar arasynda ysqa ýlanýdy boldyrmaý úshin kelesi negizgi erejelerdi saqtaý qajettigin eskertedi:
– úıdegi barlyq elektr symyn jaramdy kúıde ustańyz;
– jylý berý kezeńinde, jylytý peshteriniń murjasyn, kúıe qubyryn tazartyńyz;
– murjadaǵy tartqyshty tekserip, túnde murjany jappańyz;
– aǵash, zyǵyr mata jáne basqa janǵysh zattardy peshte, murjada jáne basqa da jylytý qurylǵysynda keptirýge jol bermeńiz;
– avtonomdy jylytý jáne gaz qurylǵysyyn qaýipsiz paıdalaný erejesin saqtańyz.
