Almatyda jerdi zańsyz ıemdengen 64 tulǵaǵa aıyppul salyndy

ALMATY. QazAqparat - Almaty qalasynyń qurylysyn baqylaý basqarmasy basshysynyń orynbasary Oljas Tólebaev onlaın brıfıng barysynda jerdi zańsyz basyp alǵany úshin 64 tulǵaǵa 8,4 mln teńge aıyppul salynǵanyn jetkizdi, dep habarlaıdy QazAqparat tilshisi.

«Jerdi ruqsatsyz basyp alǵany úshin 64 adamǵa 8,4 mln teńge somasynda aıyppul salyndy. Sonymen qatar, jalǵa berý merzimi ótken 1114 jer ýchaskesi anyqtaldy, onyń 104-i memleketke qaıtaryldy, 473-iniń jalǵa berý merzimi uzartyldy, 53-i boıynsha sharalar qoldanyldy, 61 jer telimi jeke menshikke óteý jolymen berildi, 423 jer ýchaskesi boıynsha jumystar júrgizilip jatyr. Kósheler men aýla aýmaqtarynyń boıynda memlekettik qordyń jerine ruqsatsyz ornatylǵan 300-ge jýyq zańsyz nysan, ıaǵnı 147 garaj, 28 statsıonarlyq emes saýda obektisi, 95 qorshaý sot isin júrgizýsiz anyqtaldy jáne buzyldy», - deıdi Oljas Tólebaev.

Sondaı-aq aýdany 3760,9 ga quraıtyn 2840 jer ýchaskesi nysanaly maqsaty boıynsha paıdalanylmaǵany anyqtalǵan. Onyń ishinde aýmaǵy 595 ga quraıtyn 755 jer ýchaskesi ıgerilgen, 147 paıdalanylmaǵan retinde tartyp alyndy. Aýdany 837 ga bolatyn 312 aýyl sharýashylyǵy jer ýchaskesi ıgerilgen.

«Baqylaý fýnktsııalary aıasynda 333 jospardan tys tekserý júrgizildi. Nátıjeler boıynsha jalpy somasy 92 mln teńgeni quraıtyn 477 ereje buzýshylyq anyqtaldy. Jyl basynan beri zańsyz salynǵan 17 nysan buzyldy, onyń ishinde Qarasaı batyr kóshesi, 156A meken-jaıy boıynsha ornalasqan kafe, Sátbaev kóshesi, 119 meken-jaıyndaǵy saýda pavılony, Gogol kóshesi, 169 meken-jaıyndaǵy jazǵy kafe bar», - dedi ol.