Almatyda jer silkinisi týraly aldyn ala habar beretin qurylǵy ornatylyp jatyr
Onyń aıtýynsha, Seısmologııa ınstıtýty 2018 jyldan beri «Qazaqstannyń ońtústik-shyǵysyndaǵy seısmıkalyq qaýipti aımaqtardy keshendi zertteý jáne kúshti jer silkinisi týraly aldyn-ala eskertý júıesiniń negizderin jasaý» baǵdarlamasy boıynsha jumys júrgizýde.
«Sol baǵdarlamany iske asyrý aıasynda ınstıtýt japondyq sheshim bazasynda testileý rejıminde erte habardar etý júıesiniń 9 seısmıkalyq stantsııasyn ornatty. 2023 jylǵa deıin seısmıkalyq datchıktermen, avtonomdy qýat kózderimen jabdyqtalǵan taǵy 28 stantsııa ornatý, sondaı-aq Seısmologııa ınstıtýty men TJD-de dıspetcherlik pýnktter ashý josparlanýda»,-deıdi Baqytjan Saǵyntaev.
Júıe avtomatty rejımde joıqyn seısmıkalyq tolqynnyń qalaǵa jaqyndaǵany týraly sıgnal beredi jáne turǵyndarǵa erte eskertý jasalady. Eskertý Darmen mobıldi qosymshasynyń kómegimen iske asady. Jer silkinisi týraly sıgnal 40 sekýndqa deıingi aralyqta habarlanady.
«Almaty jer silkinisi, sel, kóshkin, qar kóshkini, sý basý, órt sııaqty tehnogendik jáne tabıǵı sıpattaǵy tótenshe jaǵdaılarǵa beıim. Jeke quramnyń 1,5 myńnan astam adamy, 270 tehnıka birligi tótenshe jaǵdaıdyń zardaptaryn joıýǵa únemi daıyn. Qalanyń qutqarýshylary jylyna orta eseppen 3 myńnan astam jerlerge barady. Tótenshe jaǵdaı kezinde halyqty oqytý jáne qaýipsiz tártip mádenıetin, ózderin durys ustaý daǵdylaryn qalyptastyrý maqsatynda elimizde balamasy joq ınnovatsııalyq joba bolyp tabylatyn sımýlıatsııaly oqý- ádistemelik ortalyq salynýda»,- dedi Almaty ákimi.