Almatyda «Jer saǵaty» aktsııasy aıasynda birqatar ǵımarattardyń jaryq kózderi sóndiriledi
ALMATY. QazAqparat- Almatyda 2016 jyldyń 19 naýryzynda «Jer saǵaty» aktsııasy aıasynda birqatar sharalar ótkiziledi. Bul týraly búgin Almaty qalasy ákiminiń baspasóz qyzmeti habarlady.
«Saǵat 20:30-dan 21:30-ǵa deıin Kóktóbe munarasyndaǵy, «Sunqar» shańǵy tramplınderi keshenindegi, Respýblıka alańyndaǵy nysandardyń, ál Farabı dańǵyly boıyndaǵy Halyq banki, «Bılaın Kazahstan» kompanııasy men «Tehnodom» dúkenderiniń jaryq kózderi óshiriledi», - delingen habarlamada.
Sondaı-aq, 19 naýryz kúni keshki saǵat 20:15-te Abaı dańǵyly men Baıtursynov kóshesiniń boıynda velosherý ótkizilip, «Almaly» saýda oıyn-saıyq kesheni aldynda márege jetedi.
Al, saǵat 21:00-de «Almaly» saýda oıyn-saıyq kesheni aldyndaǵy alańda fleshmob pen túrli konkýrstar bolady.
Sharalardy Almaty qalasy ákimdiginiń qoldaýymen Qazaqstannyń Veloqoǵamdastyǵy uıymdastyrady.
