Almatyda JEO-lardyń ekologııaǵa zııanyn avtomatty datchıkter anyqtap otyrady
ALMATY. QazAqparat - Almatyda Jylý elektr ortalyqtaryna aýany lastaý kórsetkishin baqylaıtyn avtomatty qurylǵy ornatyldy, dep habarlaıdy QazAqparat tilshisi.
Bul týraly qalalyq Ekologııa departamentiniń basshysy Orman Aqqozıev Óńirlik kommýnıkatsııalar qyzmetinde aıtty.
«2018 jyldyń qańtarynda «Almaty elektr stantsııalary» AQ-men yntymaqtastyq týraly memorandýǵa qol qoıyldy. Ýaǵdalastyq aıasynda JEO-1 jáne JEO-2-de avtomattandyrylǵan datchıkterdi ornatý jumystary júrgizilip jatyr. Osy baǵytta jumys bolashaqta da jalǵasady», - dedi Orman Aqqozıev.
Onyń aıtýynsha, qalada Ekologııalyq qaýipsizdik tujyrymdamasy aıasynda qorshaǵan orta sapasynyń nysanaly kórsetkishteri belgilengen.
2017 jyly Almaty ákimdigi bul maqsatqa 150 mln teńge kóleminde qarajat bóldi.
Bul jumystyń barlyǵy «Aqparattyq Qazaqstan-2020» Memlekettik baǵdarlamasy týraly» 2013 jylǵy 8 qańtardaǵy QR Prezıdentiniń Jarlyǵy men «Sandyq Qazaqstan Memlekettik baǵdarlamasy» aıasynda júrgizilip otyr.
Sonymen qatar, QR Energetıka mınıstrligi bıyl Ekologııalyq kodekstiń jańa redaktsııasyn ázirleýdi jáne ony 2019 jyly Parlamentke usynýdy josparlap otyr.
Foto: greenbiz.com
