Almatyda jeńil kólik kópirden qulap ketti
ALMATY. QazAqparat - Almatyda túnde Rysqulov dańǵyly men Kúderın kóshesindegi jolaıryqta Toyota Camry kóligi kópirden qulap ketti. Saldarynan úsh adam zardap shekti, dep habarlaıdy QazAqparat tilshisi.
Jol apatynyń vıdeosy áleýmettik jelide tarady.
Almaty qalalyq polıtsııa departamentiniń málimetinshe, oqıǵa túngi saǵat 01:50-de Alataý aýdanynda bolǵan.
«2002 jyly týǵan Toyota Camry kóliginiń júrgizýshisi Rysqulov dańǵyly boıymen batys baǵytta, Kúderın kóshesiniń qıylysynda, róldi basqara almaı, jol ótpesiniń batys jaǵynan metall qorshaý - kedergige soǵylyp, odan ári kópirden aýdarylyp ketken», - dep habarlady Almaty polıtsııasynan.
Oqıǵa saldarynan júrgizýshi túrli dene jaraqatyn alyp, qaladaǵy aýrýhanalardyń birine jetkizildi.
«Sonymen qatar, onyń eki jolaýshysy 1999 jyly týǵan azamat G. men 2003 jyly týǵan azamat K. medıtsınalyq kómekke júginip, aýrýhanaǵa jetkizildi. Bul derekti Alataý aýdanynyń polıtsııa qyzmetkerleri óndiriske aldy», - dep atap ótti vedomstvodan.
