Almatyda jeńil avtokólik qoqys tógetin shuńqyrǵa túsip ketti
ALMATY. QazAqparat - Almatyda turǵyn úıdiń aýlasynda jeńil avtokólik shuńqyrǵa aýdarylyp qaldy, dep habarlaıdy QazAqparat tilshisi.
Jelide taraǵan vıdeoda kóliktiń Saın - Jubanov kósheleriniń qıylysyndaǵy aýlalardyń birinde aýdarylyp jatqany aıtylady.
Atalmysh oqıǵaǵa baılanysty Áýezov aýdanynyń ákimdigi túsinik berdi.
Ákimdiktiń málimetinshe, atalǵan ýchaske - birinshi shaǵynaýdandaǵy 74 jáne 76 úılerdiń arasyndaǵy qatty turmys qaldyqtaryn (QTQ) shyǵarýǵa arnalǵan qoqys alańyna irgeles aýmaq.
«Bul ýchaskeni jaqyn mańdaǵy úılerdiń turǵyndary qoqys shyǵarý úshin paıdalanady. Kómilgen konteınerlerden QTQ shyǵarý jumystaryn «Tártip» AQ merdiger uıymy júrgizedi. Tapsyrys berýshi - ekologııa jáne qorshaǵan orta basqarmasy. Búkil osyndaı shuńqyrlardy aýdannyń kommýnaldyq qyzmetteri únemi kómip otyrady», - dep habarlady Áýezov aýdanynyń ákimdigi.
Ákimdik sondaı-aq kólik aýdarylyp qalǵan shuńqyrdyń qazir jabylǵanyn habarlady.
