Almatyda jeńil atletıkadan el birinshiligi aıaqtaldy
ASTANA. QazAqparat - Almatyda jeńil atletıkadan jastar men eresekter arasynda el birinshiligi aıaqtaldy, dep jazady «Habar 24».
Respýblıkamyzdyń ár aımaǵynan kelgen 200-den astam sportshyǵa ese jibermegen Nıkıta Fılıpov syryqpen sekirýde 5 metr 40 santımetrdi baǵyndyryp, Qazaqstan chempıony atandy.
400 metrge júgirýden soltústikqazaqstandyq Mıhaıl Lıtvın top jardy. Onyń ýaqyt kórsetkishi - 47,46 sekýnd. Pavlodarlyq Igor Kondratev pen Sergeı Zaıkovqa kúmis jáne qola medal buıyrdy.
Qyzdar arasyndaǵy synda 6 metr 13 santımerge sekirgen Marııa Ovchınnıkova jeńimpaz atandy.
Qysqa qashyqtyqta qustaı ushatyn jelaıaqtardyń biri Vıktorııa Zıabkına aldyna jan salǵan joq. Al jastar arasyndaǵy jarysta júlde alǵan Aınur Bekmaǵanbetova men Nazerke Ómirǵalıevanyń bolashaǵynan mamandar zor úmit kútip otyr.
Almatynyń Ortalyq stadıonynda oza shapqandar endi halyqaralyq jarystarda el namysyn qorǵaıdy.
«Kóńilim tolady. Buıyrǵany osy bolyp turǵan ǵoı. Biraq alda maqsattarym kóp. Ár sportshynyń maqsaty - álem chempıony bolý», - Qazaqstan birinshiliginiń qola júldegeri Nazerke Ómirǵalıeva.
