Almatyda jeńil atletıkadan «Azııa juldyzdary» IV Halyqaralyq týrnıri ótedi
ALMATY. 30 maýsym. QazAqparat - Almatyda 30 maýsym men 1 shildede jeńil atletıkadan «Azııa juldyzdary» IV Halyqaralyq týrnıri bolady.
Ol Azııa jeńil atletıka qaýymdastyǵy prezıdenti Sýresh Kalmadıdiń bastamasy boıynsha Azııa qurlyǵynda jeńil atletıkany damytý maqsatynda alǵash ret 2004 Úndistanda uıymdastyrylǵan bolatyn. Odan keıin bul dúbirli doda 2008 jáne 2010 jyldary Úndistan men Sıngapýrde óz jalǵasyn tapqan edi. Bıyl ol tuńǵysh ret Qazaqstanda ótkeli otyr. Oǵan Vetnam, Indonezııa, Iran, Gonkong, Japonııa, Qazaqstan, Qyrǵyzstan, Malaızııa, Ózbekstan, Sırııa, Taıland, Úndistan, Fılıppın, Shrı-Lanka elderinen komandalar qatysqaly otyr.
«Bul Londonda ótetin HHH Jazǵy Olımaıada oıyndarynyń Azııadaǵy lıtsenzııalyq sońǵy irikteý týrnıri bolmaq. Onda sportshylar 4 jylda bir ótetin eń iri sport dodasyna qatysýǵa jol ashatyn qajetti normatıvterin oryndaýǵa múmkindik alady. Bul jarysta erler - 8, áıelder - 7 sport túri boıynsha ózara fınaldyq saıystaryn ótkizedi», - deıdi QR Jeńil atletıka federatsııasynyń bas hatshysy Alekseı Konrat. Onyń aıtýynsha, «Azııa juldyzdaryna» qatysatyn áıgili sportshylar arasynda jarys qojaıyndarynan Álem chempıony Olga Rypakova, Azııa chempıonatynyń jáne Azııa oıyndarynyń chempıondary Roman Valıev, Evgenıı Ekıov, Irına Ektova, Evgenıı Meleshenko, Tatıana Azarova, Marına Aıtova bar. Al qonaqtardan ırandyq Marıam Toozı men Ehsan Mohadjer, úndistandyq Lýka Tıntý men Abraham Djozef, ındonezııalyq Iravatı Dedeh, fılıppındik Torres Morıstella, vetnamdyq Troýng Thang Gang, taılandtyq Vanıda Boonvan, sırııalyq Madjıd Chazal, japondyq Mamı Ishıno, shrı-lankalyq Manjýla Vıjjesekara sııaqty Azııa oıyndarynyń jeńimpazdary men júldegerleri kelmek. Onda Azııa jeńil atletıka qaýymdastyǵy qorynan: birinshi orynǵa - myń, ekinshi orynǵa - 500, úshinshi orynǵa - 400, tórtinshi orynǵa - 300, besinish orynǵa - 100 AQSh dollary kóleminde júlde taǵaıyndalyp otyr.
