Almatyda jeńgetaılyqpen aınalysqan Ońtústik Koreıa azamaty ustaldy
ALMATY. QazAqparat - Ońtústik Koreıa azamaty jalǵa alǵan jeke turǵyn úıde sheteldikter úshin jezókshelik qyzmet túrin uıymdastyryp kelgen, dep habarlaıdy QazAqparat tilshisi Almaty ІІD-niń baspasóz qyzmetine silteme jasaı otyryp.
«Kásiptiń» bul túrimen aınalysqan sheteldik azamat 47 jastaǵy ońtústikkoreıalyq bolyp shyqty. Óziniń zańsyz qyzmetin ol karaoke-bar arqyly búrkep kelgen. Jezókshelik úshin ol úlken jeke turǵyn úı jaldaǵan jáne onda tek sheteldik «klıentterge» qyzmet kórsetilgen. Qyzdarǵa «aqy» sheteldik valıýta túrinde alynǵan.
«Koreıa azamaty Qazaqstan azamattarymen óte qupııa, saqtyq sharalaryn saqtaı otyryp jumys júrgizgen. Árqaısysyna jeke-jeke naqty mindet bólingen. Máselen, Almaty oblysynyń azamaty JShS dırektory retinde tirkelip, onyń zańdyq, qarjylyq máselelerimen aınalyssa, 51 jastaǵy Jambyl oblysynyń azamaty karaoke-bardyń qaýipsizdik qyzmetine jaýap bergen. Ol barǵa tek senimdi adamdardy ǵana kirgizip otyrǵan. Munda 29 jastaǵy kelinshektiń róli erekshe. Ol resmı túrde mekeme ákimshisi bolyp, astyrtyn, jynystyq qyzmet kórsetetin qyzdardy iriktep, tańdaýmen aınalysqan. Bul topta mekemeniń kassıri retinde tirkelgen 20 jastaǵy qyz da mańyzdy ról atqarǵan. Ol «klıenttermen» esep aırysyp, tólem júrgizýdi rettegen. Jeńil júristi qyzdardyń baǵasy 100-300 dollar aralyǵynda bolǵan», - dep habarlady Almaty qalasy ІІD Uıymdasqan qylmystyq toppen kúres basqarma basshysy Erlan Oralbekov.
Almaty qalasy ІІD Tergeý basqarmasy atalǵan fakt boıynsha QR QK 309-babynyń, 2-bóligi boıynsha is qozǵap, sotqa deıingi tergeý amaldaryn júrgizip jatyr.
Uıymdastyrýshy sheteldik azamat QR QPK 128-babyna sáıkes, ýaqytsha tergeý ızolıatoryna qamaldy.
