Almatyda jemqorlyqqa qarsy «Sanaly urpaq» jobasy iske asyrylýda
«QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń qyzmeti» taqyrybynda ótken suhbat barysynda Murat Ahmetov kóbinese sybaılas jemqorlyqty bilim berý mekemeleriniń basshylary jasaıtynyn aıtty.
«Almaty qalasynda 39 joǵary oqý orny jáne 285- orta mektep bar. Osyǵan oraı, bilim berý salasy departamenttiń erekshe nazarynda. Taldaý barysynda anyqtalǵandaı, kóbinese sybaılas jemqorlyqty bilim berý mekemeleriniń basshylary jasaıdy. Atap aıtqanda, bıýdjet qarajatyn urlaý, jalǵan jumysqa ornalastyrý, oryndalmaǵan jumystardy qabyldaý, aktilerine qol qoıý, para alý jáne basqa da quqyqbuzýshylyqtar oryn alyp jatady. Almaty qalasy boıynsha aǵymdaǵy jyly bilim berý uıymdarynyń eki dırektory sottaldy»,- deıdi spıker.
Sybaılas jemqorlyqqa qarsy kúres maqsatynda búginde departamenttiń basshylyǵymen «Sanaly urpaq» jobasy iske asyrylýda. Jobanyń maqsaty- bilim berý salasynda sybaılas jemqorlyq deńgeıin tómendetý, bolashaq urpaqqa sybaılas jemqorlyqqa qarsy mádenıet qalyptastyrý.
«Joba aıasynda aǵymdaǵy jyly shilde aıynda rektorlarmen kezdesý ótkizdik. Naqty usynystar men joparlar qabyldandy. Qazirgi tańda Qazaq Ulttyq pedagogıkalyq ýnıversıteti osy baǵytta birqatar jumystar jasady. Atap aıtsaq, halyqaralyq menedjment standarttaryn engizdi jáne jemqorlyq táýekelderine baǵalaý júrgizdi, 130 bilim alýshynyń testileý nátıjeleri joıyldy jáne ádistemelik usynystar men standarttar ázirledi»,- dedi M.Ahmetov.
