Almatyda Jemqorlyqqa qarsy kúres qoǵamdyq keńesiniń otyrysy ótti
ALMATY. 8 jeltoqsan. QazAqparat /Erbol Turymbetov/ - Búgin «Nur Otan» HDP Almaty qalalyq fılıaly keńsesinde Almaty qalasy Túrksib aýdany boıynsha jemqorlyqty joıý máseleleri qarastyryldy.
Otyrys barysynda alǵash ret Túrksib aýdanynyń ákimi Vladımır Ýstıýgov sybaılas jemqorlyqqa qatysty quqyq buzýshylyqtardy anyqtaý, aldyn alý jáne joıý jumysy týraly baıandama jasady. «Aýdan ákimshiligi qoldanystaǵy zańnyń sybaılas jemqorlyqqa qarsy kúreske baǵyttalǵan baptary boıynsha túsindirme semınarlar ótkizip keledi. Sondaı-aq senim telefondary, azamattardyń talap-tilekteri úshin arnaýly poshta jáshigi, turǵyndardyń ótinishterine arnalǵan ákimniń veb-saıty jumys istep tur», dedi ol. Onyń sózine qaraǵanda, osy jyldyń 11 aıynda 33 memlekettik qyzmetkerdiń jemqorlyqqa jol bergeni anyqtalǵan.
Sonymen qatar, otyrysta Túrksib aýdany boıynsha oıyn avtomattarynyń keń taralýy, zańsyz saýda oryndarynyn paıda bolýy, saýda oryndaryndaǵy sanıtarlyq jáne ekologııalyq normalarynyń saqtalmaýy sóz boldy. Oǵan qosa, jezókshelik jáne qoǵamdyq jerlerde shylym shegýge tyıym salatyn «Halyqtyń densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksi quqyq normalaryn buzý týraly máseleler qarastyryldy.
Joǵaryda aıtylǵan jaıttar boıynsha partııanyń Almaty qalalyq fılıaly, «Jas Otan» jastar qanaty men Almaty qalalyq salyq komıtetimen birigip 24-25 qarashada ótkizilgen reıdtiń nátıjesi boıynsha daıyndalǵan beınematerıal kórsetildi.
