Almatyda jekemenshik balabaqshalardyń tamaqtandyrýǵa jumsaǵan shyǵyny sýbsıdııalanady
ALMATY. QazAqparat - Búgin Almatyda qala ákimi Baqytjan Saǵyntaevtyń jáne bilim berý uıymdarynyń birinshi basshylarynyń qatysýymen Bilim basqarmasynyń alqa otyrysy ótti, dep habarlaıdy QazAqparat tilshisi.
Otyrys jumysyna qoǵam belsendileri jáne úkimettik emes sektordyń ókilderi qatysty.
«Bala týý kórsetkishiniń ósýi, qoldanystaǵy mektepke deıingi bilim berý mekemeleriniń qýatynyń jetispeýshiligi – naryqtyń aýqymdy ekenin kórsetedi. Jalpy, jekemenshik mektepke deıingi sektorda júrgizilgen zertteý nátıjeleri boıynsha jekemenshik mektepke deıingi uıymdardyń tárbıe-bilim berý qyzmetterin kórsetýdegi áleýetin ǵana emes, sonymen qatar ata-analardyń kórsetiletin qyzmetterdiń sapasyna qanaǵattanýshylyǵyn da kórsetti», - dedi Jekemenshik bilim berý uıymdarynyń respýblıkalyq qaýymdastyǵynyń tóraıymy Roza Sadyqova.
Málim etilgendeı, mektepke deıingi uıymdarǵa kezekti azaıtý jáne basqa da máselelerdi sheshý maqsatynda Almaty ákimdigi QR Bilim jáne ǵylym mınıstrligine memlekettik tapsyryspen jumys isteıtin jekemenshik baqshalardaǵy shyǵyndardy jergilikti bıýdjetten sýbsıdııalaý týraly usynys jasaǵan. Bul shara sondaı-aq jekemenshik balabaqshalarǵa qoljetimdilikti qamtamasyz etýdi, memlekettik, sondaı-aq jekemenshik balabaqshalarda ata-analar tólemin teńestirýdi kózdeıdi.
«Almaty ákimdigi qabyldaǵan is-sharalar qalamyzdyń jekemenshik mektepke deıingi bilim berý kásipkerligin damytýǵa qolaıly jaǵdaı jasaıdy jáne yntalandyrady. Mundaı is-sharalar bizdiń bárimizge artqa sheginbeı, bir orynda turyp qalmaı, alǵa jyljıtynymyzǵa, óz jumysymyzdyń nátıjesin kóretinimizge senimdilik beredi», - dedi R.Sadyqova.
Qazirgi ýaqytta Almaty qalasynyń Bilim basqarmasy Jeke bilim berý uıymdary qaýymdastyǵymen birlesip, memlekettik tapsyryspen jekemenshik mektepke deıingi uıymdarmen tamaqtaný úshin jergilikti bıýdjetten sýbsıdııalaý máselesin talqylaý boıynsha jumys júrgizýde.
«Biz jergilikti bıýdjetten memlekettik bilim berý tapsyrysy bar jekemenshik uıymdarda tólemaqyny óteý boıynsha konkýrsqa jiberýdiń mynadaı krıterıılerin usyndyq. Bul, mektepke deıingi uıymnyń mektepke deıingi tárbıe men oqytý salasyndaǵy normatıvtik aktilerge sáıkestigi. Tańdaý memlekettik bilim berý tapsyrysyn ornalastyrý boıynsha shartta kózdelgen ónim berýshiniń mindettemelerin oryndaý boıynsha monıtorıng nátıjelerine negizdeletin bolady», - dep túsindirdi R.Sadyqova.
Aıta ketý kerek, memlekettik tapsyryspen jekemenshik balabaqshaǵa baryp júrgen balalardyń ata-analary tamaqtaný shyǵyndaryn burynǵy kólemde tóleı beredi. Sýbsıdııalaý balalary alǵash ret mektepke deıingi jekemenshik uıymdarǵa memlekettik tapsyryspen baratyn ata-analarǵa ǵana qatysty. Osylaısha, memlekettik bilim berý tapsyrysyn iske asyrý aıasynda jergilikti bıýdjetten sýbsıdııalaý esebinen qarjylandyrylǵan bilim berý qyzmetteri men tamaqtaný baǵasyn óteý tutynýshynyń qaltasyna túsetin salmaqty azaıtady.
