Almatyda jekemenshik balabaqsha sany artyp keledi
«Biz qazirdiń ózinde mektepke deıingi salaǵa jeke sektordy tartýdyń jaqsy úrdisin kórip otyrmyz. Bul jeke ınvestorlar arasynda júrgizilgen belsendi túsindirý jumystarynyń, sondaı-aq qala ákimdiginiń aıtarlyqtaı qoldaýynyń arqasynda múmkin boldy», - dedi Baqytjan Saǵyntaev.
Qazir qalada barlyǵy 860 mektepke deıingi uıym bar. Onyń 22%-y nemese 189-y memlekettik menshikte. Búginde 1 jastan 6 jasqa deıingi 69 490 bala mektepke deıingi tárbıemen qamtylǵan, onyń ishinde 3 jastan 6 jasqa deıingiler - 63 920 bala.
Ákimniń aıtýynsha, bıylǵy jyly memlekettik bilim berý tapsyrysy ótken jylmen salystyrǵanda 10 244 orynǵa ulǵaıtyldy. Onyń ishinde aǵymdaǵy jyly ashylǵan 4 378 oryndy 67 jańa jeke balabaqsha da bar.
«Balalardy mektepke deıingi tárbıemen qamtýdy ulǵaıtý jáne balabaqshalardaǵy kezekti azaıtý maqsatynda ótken jyldan bastap memlekettik tapsyrys boıynsha jumys isteıtin jańadan ashylǵan jekemenshik balabaqshalardyń tamaqtaný qunyn jergilikti bıýdjet qarjysy esebinen sýbsıdııalaý mehanızmi engizildi», - deıdi ákim.
Bıyl jyly jergilikti bıýdjetten azyq-túlik shyǵyndaryn óteýge 343 mıllıon teńgeden astam qarjy qarastyryldy.
«Jańa balabaqshalar salynyp jatyr. Búginde Bostandyq jáne Naýryzbaı aýdandarynda 360 oryndy 3 memlekettik balabaqshanyń qurylysy aıaqtaldy jáne Túrksib aýdanynda 280 oryndy balabaqshanyń qurylysy júrip jatyr. Jaqyn arada 1 920 oryndy taǵy 10 memlekettik mektepke deıingi uıymnyń qurylysy bastalmaq. M.Áýezov aýdanynda uzaq merzimdi jalǵa berýden qaıtarylǵan ári kúrdeli jóndelip, seısmıkalyq kúsheıtilgen 315 oryndy memlekettik balabaqsha balalardy qabyldaýǵa tolyq daıyn. Sonymen qatar, 640 oryndy burynǵy memlekettik balabaqshalardyń 2 korpýsyna qaıta jańartý jumystary júrgiziletin bolady», - dedi megapolıs basshysy.
Budan ózge, ákimdik Almaly, M.Áýezov jáne Jetisý aýdandarynda árqaısysy 320 orynǵa eseptelgen taǵy 4 balabaqshany satyp alady.