Almatyda jekemenshik baqshadaǵy balalarǵa tegin tamaq berilýi múmkin
ALMATY. QazAqparat – Almatyda keler jyldan bastap memlekettik tapsyryspen jumys isteıtin jekemenshik balabaqshalarǵa baratyn balalardyń tamaǵy tegin bolýy múmkin. Bul týraly búgin onlaın brıfıng barysynda qalalyq Bilim basqarmasy basshysynyń orynbasary Aısulý Botaeva aıtty, dep habarlaıdy QazAqparat tilshisi.
«Bul sheshim memlekettik jáne jekemenshik baqshalarda tólenetin qarajatty teńestirý, memlekettik tapsyryspen jumys isteıtin baqshalarǵa kezekti azaıtý maqsatynda jasalyp otyr. Osyǵan baılanysty qalalyq ákimdik QR BǴM memlekettik tapsyryspen jumys isteıtin balabaqshalarda tamaqqa tólenetin qarajatty jergilikti bıýdjetten sýbsıdııalaý týraly usynys berdi», - dedi Aısulý Botaeva.
Atalǵan usynys nátıjesinde mınıstrlikte jekemenshik balabaqshalardyń qyzmetine ózgerister engizildi.
Atap aıtqanda, jergilikti bıýdjet esebinen balalardyń tamaǵyna tólenetin qarajattyń keıbir bóligin sýbsıdııalaý týraly sheshim qabyldandy.
Onyń aıtýynsha, qazir baqshalardy irikteý talaptaryna qatysty talqylaý júrip jatyr.
«Meniń oıymsha, 2021 jyldan bastap memlekettik tapsyryspen jumys isteıtin baqshalarda tamaqqa tólenetin qarajatqa sýbsıdııa jasalady», - dedi A.Botaeva.
Onyń aıtýynsha, qazir balabaqshalarda bir balanyń tamaǵyna bólinetin qarajat 18900 teńge bolyp bekitilgen.
2020 jyldyń qorytyndysyna sáıkes bir balaǵa memlekettik tapsyrys aıasynda 28 350 teńge tólenedi.
